Brasilíumenn hafa gaman af vandræðum Argentínu

Brasilíumenn hafa næstum því jafngaman af vandræðum argentínska landsliðsins eins og þeir hafa af velgengi síns landsliðs. Brasilíska landsliðið hefur unnið ellefu leiki í röð og tryggt sig inn á HM á meðan Argentína er langt frá því að vera öruggt með sæti á HM eftir að hafa tapað 3 leikjum í röð og fjórum leikjum af síðustu fimm.

Brasilíska íþróttablaðið Lance valdi eftir leikina fyrirsögnina „Fullkomin hamingja" og rökstuddi það með undirfyrirsögninni: „Brasilía var búin að tryggja sig inn á HM en skemmti sér yfir sigri á Chile og enn einu tapinu hjá Argentínu."

Fólkið á götunni hefur líka gaman af þróun mála. „Svona á þetta alltaf að vera, Brasilía á toppnum og Argentína í vandræðum. Svona viljum við hafa þetta hér," sagði Manuel Mauricio 51 árs blómasölumaður.

Brasilíumenn hafa unnið alla landsleiki sína frá því að þeir gerðu 1-1 jafntefli við Ekvador í mars og eru nú fjórum leikjum frá því að jafna met Spánverja. Þeir hafa einnig ekki tapað í 19 leikjum eða síðan að þeir lágu 2-0 fyrir Paragvæ í júní 2008.