Flugbraut lögð af og blönduð byggð reist

Ögmundur Jónasson innanríkisráðherra skrifaði í dag undir samkomulag við Jón Gnarr borgarstjóra um að hluti flugvallarsvæðisins í Vatnsmýri verði tekinn undir blandaða byggð og að minnsta flugbraut Reykjavíkurflugvallar verði lögð af, - gegn því að borgin leyfi að ný flugstöð verði reist.

Samkomulag innanríkisráðherrans og borgarstjórans var undirritað í afgreiðslu Flugfélags Íslands og staðfestir samkomulag sem Katrín Júlíusdóttir fjármálaráðherra og Dagur B. Eggertsson, formaður borgarráðs, undirrituðu á sama stað fyrir sex vikum.

Samkvæmt því eignast borgin hluta af flugvallarsvæðinu til að byggja þar 800 íbúðir í blandaðri byggð. Fallið er frá byggingu samgöngumiðstöðvar en aðstaða farþega verður í staðinn endurbætt með nýrri flugstöð. Svokallaðri norðaustur-suðvesturbraut verður lokað, en ekki er gert ráð fyrir því að í staðinn verði sambærileg flugbraut í Keflavík opnuð á ný, eins og upphaflega var sett sem skilyrði fyrir lokun þessarar brautar í Reykjavík.

Í fréttum Stöðvar 2 í síðasta mánuði varaði einn reyndasti flugmaður Íslendinga, Ómar Ragnarsson, við því að umræddu svæði yrði ráðstafað undir byggð þar sem með því yrði besta mögulega málamiðlun um framtíð flugvallar í Vatnsmýri útilokuð, málamiðlun sem gerir ráð að austur-vestur-brautin verði aðalflugbrautin en núverandi norður-suðurbraut víki fyrir  minni norður-suðurbraut og með nýrri legu.

Samkomulag innanríkisráðherra og borgarstjóra gerir ekki ráð fyrir að hnikað verði frá áformum borgarstjórnar Reykjavíkur um að norður-suðurbrautinni verði lokað árið 2016 og að Reykjavíkurflugvöllur verði rekinn með einni flugbraut, austur-vesturbrautinni, til ársins 2024, þegar honum verður endanlega lokað.