Sjálfvirkt neyðarkall í alla bíla

Framkvæmdastjórn Evrópusambandsins (ESB) leggur til breytingar sem leiða til þess að á Evrópska efnahagssvæðinu öllu verður tekið upp kerfi fyrir sjálfvirk neyðarboð lendi bílar í alvarlegum slysum. Tillögurnar á enn eftir að samþykkja í Evrópuráðinu og á Evrópuþinginu.

Hér á landi er hins vegar þegar hafinn undirbúningur að upptöku evrópska eCall-neyðarboðakerfisins. Lendi bíll í árekstri sendir hann sjálfvirkt boð í 112 og mögulega komið á talsambandi milli starfsmanns neyðarlínu og þeirra sem í bílnum eru.

„Ráðuneytið er nýbúið að halda fund um þetta þar sem verið var að ýta þessum málum af stað. Í haust förum við væntanlega að prófa þennan búnað,“ segir Þórhallur Ólafsson, framkvæmdastjóri Neyðarlínunnar.

Framkvæmdastjórn ESB segir tilganginn að draga úr skaðlegum áhrifum alvarlegra umferðarslysa í Evrópu. „Áætlað er að árlega geti kerfið bjargað allt að 2.500 mannslífum,“ segir í tilkynningu Framkvæmdastjórnarinnar.

Samkvæmt frumvarpsdrögum ráðsins verða allir nýir farþegabílar og vélknúin farartæki undir 4,5 tonnum að þyngd að vera búin eCall-búnaði frá og með októbermánuði 2015 og viðeigandi búnaði komið upp í löndum Evrópska efnahagssvæðisins.

„Tillögurnar eru skref í þá átt að gera evrópska vegi öruggari,“ segir Siim Kallas, samgöngustjóri Evrópusambandsins. „Í fyrra létu 28 þúsund manns lífið og ein og hálf milljón slasaðist á evrópskum vegum. Hver mínúta skiptir máli þegar slys verða.“ 

Framkvæmdastjórnin áætlar að stytta megi viðbragðstíma að jafnaði um 40 prósent í þéttbýli og 50 prósent í dreifðari byggðum og bjarga með því allt að 2.500 mannslífum á ári.

Tómas Gíslason, aðstoðarframkvæmdastjóri Neyðarlínunnar, segir að von sé á búnaði til landsins til þess að prófa eCall-kerfið og það sé gert í samstarfi við fjarskiptafyrirtæki sem hér reki farsímaþjónustu. 

„Við erum alla vega að fylgjast með og verðum ekki dragbítur í þessari þróun, sem við erum mjög ánægð með, segir hann. 

Tómas segir hins vegar viðbúið að breytingin taki einhvern tíma. „Rétt eins og þegar bílbeltanotkun var leidd í lög, þá voru í einhvern tíma í umferðinni bílar sem ekki voru búnir beltum.“

Samkvæmt tillögum Framkvæmdastjórnarinnar verða nýjar útgáfur bíla að verða með búnaðinn frá og með haustinu 2015. Þá er í skoðun að bjóða búnað sem setja megi í eldri bíla, kjósi fólk að gera það. 

Slíkur búnaður ætti ekki að kosta meira en 150 evrur, eða um 25 þúsund krónur. „Og mögulega gætu tryggingafélög viljað koma að því að greiða niður slíkan búnað,“ bætir Tómas við.