Hamrén: Trúi því að þetta sé rétt ákvörðun

Erik Hamrén valdi í dag landsliðshóp sinn fyrir leikina við Frakkland og Andorra í undankeppni EM 2020 um næstu helgi.

Birkir Bjarnason og Emil Hallfreðsson eru áfram í hópnum þrátt fyrir að vera ekki enn komnir með félagslið.

„Ég skil að fólki finnist þetta umdeild ákvörðun. Ég skil líka að fólk hafi aðrar skoðanir en ég,“ sagði Hamrén í viðtali við Hörð Magnússon eftir blaðamannafundinn í dag.

„Ég hef hugsað mikið um þetta, því þetta er einstök staða. En ég er mjög viss um að ég sé að taka rétta ákvörðun. Reynsla þeirra og gæði munu koma liðinu vel í þessum leikjum.“

Birkir Már Sævarsson kom aftur inn í 25 manna landsliðshópinn eftir að hafa verið skilinn eftir heima í síðasta landsliðsverkefni.

„Ég valdi þá leikmenn sem henta best í þetta verkefni og Birkir Már var einn af þeim.“

Allt viðtalið við Hamrén má sjá í spilaranum í fréttinni.