Íslenski boltinn

Víðismenn minnast Grétars Einarssonar

Óskar Ófeigur Jónsson skrifar
Grétar Einarsson var lykilmaður í Víðisliðinu á níunda áratugnum.
Grétar Einarsson var lykilmaður í Víðisliðinu á níunda áratugnum. Mynd/Víðir

Knattspyrnufélagið Víðir úr Garði minnist í dag markahæsta leikmanns félagsins í efstu deild frá upphafi en Grétar Einarsson féll frá 16. september eftir harða en skammvinna baráttu við alvarleg veikindi.

Grétar var lykilmaður í ævintýralegum árangri Víðis á níunda áratugnum þar sem þetta litla bæjarfélag eignaðist lið sem spilaði þrjú tímabil í efstu deild (1985-87) og komst í bikarúrslitaleikinn árið 1987.

Grétar Einarsson fæddist í október árið 1964 og var því á 55 aldursári.

Grétar er leikjahæsti leikmaður Víðis í efstu deild (ásamt Vilbergi Þorvaldssyni) með 71 leik og hefur jafnframt skorað flest mörk fyrir Víði í efstu deild, 18 talsins. Á ferli sínum lék Grétar alls 323 leiki og skoraði 159 mörk fyrir Víði.

Grétar lék einnig með Keflavík, FH og Grindavík og spilaði þrjá A-landsleiki 1991 til 1992. Hann skoraði alls 34 mörk í 150 leikjum í efstu deild karla á Íslandi.

Grétar spilaði síðasta leik sinn fyrir Víði árið 2008 og skoraði þá mark í sigri á Árborg í bikarleik 44 ára gamall.

Eftir að Grétar hætti að spila með meistaraflokki var hann aðstoðarþjálfari hjá liðinu og sat í stjórn félagsins í fjölda ára, bæði aðalstjórn og unglingaráði.

„Grétar Einarsson var frábær liðsmaður sem allir vildu hafa í sínu liði. Hann hafði mikið keppnisskap og sigurvilja og var mikill markaskorari. Það var líka alltaf stutt í grínið hjá Grétari og það var gaman að vera í kringum hann,“ segir í minningarorðum á fésbókarsíðu Víðis sem má sjá hér fyrir neðan.




Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.