Aðeins þrír hafa spilað fleiri landsleiki en Gylfi fyrir þrítugsafmælið

Gylfi Þór Sigurðsson hélt í gær upp á þrítugsafmælið sitt með því að ferðast með íslenska landsliðinu til Albaníu.

Gylfi fæddist 8. september 2019 og fékk því sigur á Moldóvum í hálfgerða afmælisgjöf á laugardaginn.

Gylfi lék þar landsleik númer 69 og það eru aðeins þrír leikmenn sem hafa náð að spila fleiri A-landsleiki fyrir þrítugsafmælið sitt.

Efstur á blaði er fyrirliði landsliðsins í dag, Aron Einar Gunnarsson, sem hélt upp á þetta stórafmæli fyrr á þessu ári. Aron Einar varð þrítugur 22. apríl síðastliðinn og var þá nýbúinn að spila sinn 83. landsleik.

Aron Einar hafði þar gert betur en landsleikjametshafinn Rúnar Kristinnsson sem lék 77 af 104 landsleikjum sínum fyrir þrítugsafmælið sitt.

Jóhann Berg Guðmundsson er síðan sá þriðji en hann getur enn bætt við leikjum því hann verður ekki þrítugur fyrr en í lok október á næsta ári. Jóhann Berg er níu leikjum á eftir Aroni Einari og á því möguleika á metinu.

Jóhann Berg gat ekki spilað með landsliðinu í núverandi verkefni en verður vonandi búinn að ná sér fyrir verkefnin í október.

Hér fyrir neðan má sjá þá leikmenn sem hafa spilað oftast fyrir íslenska landsliðið fyrir þrítugsafmælið sitt.

Flestir landsleikir fyrir þrítugsafmælið sitt:

83 - Aron Einar Gunnarsson

77 - Rúnar Kristinsson

74 - Jóhann Berg Guðmundsson (ekki orðinn)

69 - Gylfi Þór Sigurðsson

65 - Birkir Bjarnason

62 - Guðni Bergsson

61 - Ólafur Þórðarson

61 - Indriði Sigurðsson

58 - Ragnar Sigurðsson

57 - Arnar Grétarsson

55 - Hermann Hreiðarsson

54 - Marteinn Geirsson

54 - Helgi Sigurðsson

54 - Brynjar Björn Gunnarsson

53 - Eiður Smári Guðjohnsen

53 - Alfreð Finnbogason