Innlent

Ekki í kortunum að bæta aðstæður vegna slökkvibíla

Jóhann K. Jóhannsson skrifar
Ekki er í kortunum að bæta veginn inn Skorradal. Vegurinn er ekki á viðhaldsáætlun Vegagerðarinnar í ár.
Ekki er í kortunum að bæta veginn inn Skorradal. Vegurinn er ekki á viðhaldsáætlun Vegagerðarinnar í ár. Vísir/Jóhann K

Engin ákvörðun hefur verið tekin um það hvort vegaframkvæmdum eða fé til vegaframkvæmda verði breytt á Vesturlandi í kjölfar gagnrýni lögreglustjórans á Vesturlandi á veginn inn í Skorradal. Lögreglustjóri sagði veginn þröngan og hefði líklega ekki burði til þess að þola umferð slökkviliðsbíla.

Þá sagði hann að erfitt gæti reynst fyrir slökkvilið að komast að Skorradalsvatni, ef þörf væri að vatni, sökum þess að slökkvibílar kæmust ekki að Skorradalsvatni ef upp kæmu gróðureldar. 

Tvær vikur eru síðan almannavarnardeild Ríkislögreglustjóra, í samráði við Lögreglustjórann á Vesturlandi, lýsti yfir óvissustigi á svæðinu vegna hættu á gróðureldum, sérstaklega í Skorradal, vegna langvarnandi þurrka. Óvissustig er enn í gildi þrátt fyrir litla vætu á köflum síðustu daga.

Litlar sem engar aðstæður eru á veginum inn Skorradal fyrir slökkvliðsbíla til þess að athafna sig. Vegurinn er þröngur og erfiður á köflum. Vísir/Jóhann K

Höfum verið að vinna í veginum en „betur má ef duga skal“

Pálmi Þór Sævarsson, svæðisstjóri Vegagerðarinnar á Vesturlandi, segir stofnunina að sjálfsögðu taka öllum ábendingum og gagnrýni alvarlega og ljóst að þetta mál sé nauðsynlegt að skoða sem fyrst.

Pálmi segir að Vegagerðin hafi unnið að Skorradalsvegi, og að í fyrra hafi kafli á milli Dagverðarness og Fitja verið styrktur, en bætir við að betur megi ef duga skal. Hann bætir því við að starfsmenn Vegagerðarinnar hafi snemma í vor klippt og fjarlægt gróður úr vegkantinum sem hann segir að myndi hjálpa til ef alvarlegt ástand myndi skapast á svæðinu.

Til dæmis ef fólk í dalnum þyrfti að rýma svæðið vegna gróðurelda.

Sjá einnig: Söguðu og brutu niður tré í Skorradal í leyfisleysi

Óvissustig almannavarna er enn í gildi í Skorradal vegna langvarandi þurrka. Vísir/Jóhann K

Ekki í kortunum að bæta aðstæður vegna slökkvibíla

Pálmi segir það vel athugandi að Vegagerðin, í samráði við Skorradalshrepp, útbúi athafnasvæði, eða snúningsvæði fyrir slökkvilið og slökkvibíla á svæðinu. Það sé ekki í kortunum eins og staðan sé núna.

Nokkru fé verður veitt í vegaframkvæmdir á svæðinu á næstu misserum. Fljótlega hefjast framkvæmdir við breikkun og lagningu bundins slitlags á 3,7 kílómetra kafla milli Vatnsendahlíðar og Dagverðarness, þar sem erfiður kafli um Hvammsklif verður meðal annars lagaður.

Kostnaður við þær framkvæmdir er áætlaður um 270 milljónir. Þá verður einnig unnið í styrkingum og mölburði víðar á svæðinu, en Skorradalsvegur er sérstaklega ekki á viðhaldsáætlun í ár.

Viðbragðsáætlanir hafa verið gerðar á undanförnum árum vegna gróðurelda í sumarhúsabyggðum eins og í Skorradal. Vísir/Bjarni

Hægt að breyta áætlunum í vegagerð á svæðinu sé tryggt fjármagn

Pálmi segir að allar framkvæmdir Vegagerðarinnar séu háðar fjárveitingum hverju sinni en að ekki séu frekari fjármunir í framkvæmdir á Skorradalsvegi að svo stöddu. Hann segir hins vegar ljóst að hægt væri að fara í einhverjar aðgerðir sem ekki væri skipulagsskyldar ef fjármagn væri tryggt.

Pálmi segir jafnframt að umræðan um hættuna í Skorradal gefi tilefni til að endurskoða framkvæmdaáætlun Vegagerðarinnar.

Eins og sjá má getur reynst erfitt fyrir slökkviliðsmenn að vinna með stóra slökkviliðsbíla í Skorradal. Mynd/Ágúst Ágústsson

Hálfur milljarður í vegaframkvæmdir en engin snýr að hættunni í Skorradal

Aðrar framkvæmdir sem eru í kortunum á svæðinu eru á Grímarsstaðarvegi (5317), það er frá Hvanneyri að Hvítárbrú. Þar á að bæta 5,8 kílómetra kafla og er áætlaður kostnaður um 175 milljónir. Það verk hefur þegar verið boðið út.

Þá er einnig í kortunum að leggja bundið slitlag á Mófellsstaðaveg (507), það er frá Borgarfjarðarbraut að Hreppslaug. Kaflinn er 1,7 kílómetrar og er kostnaður áætlaður um 40 milljónir.

Pálmi segir að ekki sé búið að taka ákvörðun um útboð á þeim vegi og að það verði líklega ekki á þessu ári.


Tengdar fréttir

Gróðureldar verði ein sviðsmynd almannavarna

Forstjóri Mannvirkjastofnunar segir meiri líkur en áður á stórum gróðureldum á Íslandi vegna loftslagsbreytinga og nýs gróðurfars. Stofnunin hefur lagt til við dómsmálaráðuneytið að gróðureldum verði bætt við sviðsmyndir almannavarna

Öryggi þúsunda ógnað með ótryggum flóttaleiðum

Öryggi þúsunda er ógnað í Skorradal þar sem flóttaleiðir eru ótryggar komi þar upp gróðureldur að mati lögreglustjóra Vesturlands. Hann segir yfirvöld þurfa að grípa til aðgerða. Óvissuástandi almannavarna hefur verið lýst yfir.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.