Fótbolti

Einkunnir Íslands: Markamaskínan Raggi Sig maður leiksins

Henry Birgir Gunnarsson skrifar
Ragnar fagnar öðru marka sinna í kvöld.
Ragnar fagnar öðru marka sinna í kvöld. vísir/getty
Strákarnir okkar voru frábærir í kvöld en íþróttadeild ákvað að velja miðvörðinn og markamaskínuna Ragnar Sigurðsson sem mann leiksins í kvöld.



Raggi var frábær sem og allt liðið í kvöld. Ef sólin hefði ekki verið að þvælast fyrir þá hefði miðvörðurinn líklega skorað þrennu.



Það var ekki veikan blett að finna í leik íslenska liðsins í kvöld sem sýndi að teitið er ekkert að klárast strax. Geggjuð frammistaða.



Einkunnir Íslands:



Hannes Þór Halldórsson, markvörður - 7

Stóð fyrir sínu venju samkvæmt. Varði það sem hann átti að taka og var skynsamur í sínum aðgerðum.



Hjörtur Hermannsson, hægri bakvörður - 7

Mjög traustur og virkar nokkuð tilbúinn í byrjunarliðshlutverk. Lét þó lítil til sín taka fram á við.



Ragnar Sigurðsson, miðvörður - 9

Gjörsamlega geggjaður. Tvö frábær mörk og var ekki fjarri miðvarðarþrennu. Át þess utan allt í vörninni. Maður leiksins.



Kári Árnason, miðvörður - 8

Kári og Raggi eru bara eins og Halli og Laddi. Einstök tvenna sem nær ákaflega vel saman. Enn einn flotti leikurinn hjá Kára.



Ari Freyr Skúlason, vinstri bakvörður - 7

Aftur mjög traustur, tók enga sénsa og gerði sitt. Rétt eins og Hjörtur lítið að fara fram.



Jóhann Berg Guðmundsson, hægri kantmaður - 8

Átti víst að vera meiddur en lék stórkostlega. Alltaf að búa til og síógnandi. Mikill kraftur í Jóa sem var gaman að sjá.



Aron Einar Gunnarsson, miðjumaður - 8

Meiri orka í Aroni en oft áður og virðist njóta sín vel á miðjunni með Emil. Báðir virkilega góðir og ná vel saman.



Emil Hallfreðsson, miðjumaður - 8

Emil var frábær á miðjunni eins og búast mátti við. Virkilega gott jafnvægi á íslenska liðinu með hann og Aron í vélarrýminu.



Birkir Bjarnason, vinstri kantmaður - 7

Í litlu leikformi en gefur allt sem hann á. Spilaði skynsamlega og komst í fínar stöður. Má vera sáttur með sitt.



Gylfi Þór Sigurðsson, sóknarmaður - 9

Giftingargalsi í Gylfa sem hljóp eins og naut um allt. Gæðin láku af honum í öllu sem fyrr. Ómetanlegur.



Jón Daði Böðvarsson, sóknarmaður - 8

Spilaði síðast 16. febrúar. Var ótrúlegur og gaf liðinu svo mikið. Djöflaðist út um allt, dró menn til sín og bjó til pláss fyrir aðra. Unaður að sjá hann aftur á toppnum.



Varamenn:



Kolbeinn Sigþórsson - (Kom inn fyrir Jón Daða á 64. mín) 6

Ekki jafn beittur og í síðasta leik en gott að hann sé að fá mínútur.



Hörður Björgvin Magnússon - (Kom inn fyrir Ara Frey á 69. mínútu) 6

Bætti litlu við en gaf ekki færi á sér.



Arnór Ingvi Traustason - (Kom inn fyrir Jóhann Berg á 80. mínútu) -

Tengd skjöl


Tengdar fréttir

Leik lokið: Ísland - Tyrkland 2-1 | Ragnar hetjan gegn Tyrkjum

EM-draumur strákanna okkar lifir heldur betur góðu lífi eftir stórkostlegan sigur, 2-1, á Tyrkjum á Laugardalsvelli í kvöld. Strákarnir sýndu frábæra frammistöðu og þeir sem héldu að partíið væri búið þurfa að skoða sín mál.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.