Erlent

„Holdgervingur illskunnar“ hlaut lífstíðardóm

Kristín Ólafsdóttir skrifar
Patterson rændi hinni þrettán ára gömlu Jayme Closs í október á síðasta ári.
Patterson rændi hinni þrettán ára gömlu Jayme Closs í október á síðasta ári. Mynd/Facebook

Karlmaður í Wisconsin-ríki í Bandaríkjunum var í dag dæmdur í lífstíðarfangelsi fyrir að myrða foreldra hinnar þrettán ára Jayme Closs í fyrra og halda henni svo fanginni í tæpa þrjá mánuði.

Jake Patterson, 21 árs, játaði í mars að hafa skotið foreldra Jayme, þau Denise og James Closs, til bana á heimili þeirra í október síðastliðnum, rænt stúlkunni og haldið henni í gíslingu í afskekktum kofa í grennd við bæinn Gordon í Wisconsinríki.

Sjá einnig: Jayme Closs fær sjálf fundarlaunin

Jayme slapp úr prísundinni í janúar eftir 88 daga í haldi Pattersons. Hún var m.a. neydd til að fela sig undir rúmi ræningja síns í allt að tólf klukkutíma í senn án þess að fá vott né þurrt, að því er fjölmiðlar vestanhafs hafa haft upp úr skjölum málsins.

„Hann getur ekki svipt mig frelsinu“

Dómsuppkvaðningin í dag var tilfinningaþrungin, samkvæmt fréttaflutningi af málinu. Fjölskyldumeðlimir Jayme mættu margir í dómsal og lýstu hryllilegum áhrifum voðaverkanna á stúlkuna. Þá var dómarinn í málinu, James Babler, harðorður í garð Pattersons.

„Þú ert holdgervingur illskunnar,“ sagði Babler, og beindi þá orðum sínum að sakborningnum. „Ég er ekki í vafa um það að þú sért ein hættulegasta manneskjan sem uppi hefur verið.“

Sjálf var Jayme ekki viðstödd dómsuppkvaðninguna en lögmaður hennar las upp yfirlýsingu fyrir hennar hönd.

„Í október síðastliðnum svipti Jake Patterson mig ýmsu sem ég elska. Það hryggir mig mest að hann hafi tekið mömmu mína og pabba frá mér,“ sagði í yfirlýsingu Jayme. „En hann getur ekki svipt mig frelsinu. Hann hélt að hann gæti slegið eign sinni á mig en hann hafði rangt fyrir sér. Ég var sterkari. Ég mun alltaf búa yfir frelsi mínu en hann ekki.“

Valdi Jayme af handahófi

Patterson, sem sagðist sjá eftir því sem hann gerði fyrir dómi í dag, hlaut tvo lífstíðardóma fyrir morðin á foreldrum Jayme, og 40 ára dóm til viðbótar fyrir mannránið. Yfirvöld komust ekki á sporið um aðild hans að málinu fyrr en Jayme fannst í janúar og vísaði lögreglu á hann.

Áður hefur komið fram að Patterson virðist hafa valið Jayme af handahófi en hann sá hana fyrst þegar hún steig upp í rútu á leið í skólann. Hann hafi þó þegar í stað ákveðið að ræna henni og undirbjó sig vel fyrir mannránið. Hann rakaði til að mynda af sér allt hár, til að vera fullviss um að hann myndi ekki skilja eftir sig ummerki á vettvangi glæpsins.


Tengdar fréttir

Jayme Closs fær sjálf fundarlaunin

Bandaríska stúlkan Jayme Closs fannst á vegi í Wisconsin þann 10. janúar síðastliðinn eftir að hafa verið haldið fanginni af 21 árs karlmanni í 88 daga.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.