Fótbolti

Rekinn eftir misheppnað Panenka-víti

Ingvi Þór Sæmundsson skrifar
Bendrix Parra fékk gult spjald í leiknum en rautt frá félaginu.
Bendrix Parra fékk gult spjald í leiknum en rautt frá félaginu. vísir/getty
Bendrix Parra, leikmaður Independiente Campo Grande í Paragvæ, var rekinn frá félaginu út af misheppnuðu Panenka-víti sem hann tók í vítaspyrnukeppni í leik gegn La Equidad frá Kólumbíu á dögunum.

Þetta var seinni leikur Independiente og La Equidad í 32-liða úrslitum Copa Sudamericana sem er ígildi Evrópudeildarinnar í Suður-Ameríku.

Ekkert mark var skorað í leikjunum tveimur og því réðust úrslitin í vítaspyrnukeppni.

Parra tók þriðju spyrnu Independiente og ætlaði að vera kaldur karl og vippa boltanum á mitt markið. Það mistókst hrapallega og Diogo Novoa, markvörður La Equidad, varði auðveldlega. La Equidad vann vítakeppnina, 4-3.

Forráðamenn Independiente höfðu engan húmor fyrir tilburðum Parras og eru búnir að reka hann frá félaginu.

Miðjumaðurinn frá Venesúela þarf nú að finna sér nýtt félag og hugsar sig væntanlega tvisvar um áður en hann tekur annað Panenka-víti.




Fleiri fréttir

Sjá meira


×