Fótbolti

Solskjær mun ekki minnast á stærstu stund fótboltaferilsins

Tómas Þór Þórðarson skrifar
Ole Gunnar Solskjær fagnar fræknasta marki ferilsins.
Ole Gunnar Solskjær fagnar fræknasta marki ferilsins. vísir/getty

Ole Gunnar Solskjær, knattspyrnustjóri Manchester United, mun ekki nota stærstu stund sína sem fótboltamaður til þess að hvetja núverandi lærisveina sína til dáða í liðsræðum fyrir stórleikinn gegn Barcelona á Nývangi annað kvöld.

United er 1-0 undir í einvíginu í átta liða úrslitum Meistaradeildarinnar eftir tap á heimavelli en United sneri 2-0 tapi á heimavelli við í síðustu umferð á móti Paris Saint-Germain og vann 3-1 í París.

Solskjær er auðvitað þekktastur fyrir markið sem að hann skoraði í uppbótartíma á móti Bayern München í úrslitaleik Meistaradeildarinnar árið 1999 en United skoraði tvö í uppbótartíma og tryggði sér sigur í Meistaradeildinni.

„Nei, ég mun ekki minnast á sigurinn 1999 því hann var á móti Bayern München, það var úrslitaleikur og það var bara öðruvísi,“ segir Solskjær.

„Við munum styðjast við leikinn á móti PSG og fræga sigurinn á móti Juventus á útivelli 1999 eins og síðast. Við höfum unnið góð lið á útivelli á þessari leiktíð og spilað á móti frábærum leikmönnum.“

„Barcelona var í vandræðum með okkur nokkrum sinnum í leiknum þrátt fyrir að hafa stýrt honum undir restina. Börsungar voru meira með boltann en þeir ógnuðu okkur aldrei í seinni hálfleik,“ segir Ole Gunnar Solskjær.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.