Aron fékk tak í bakið en verður klár gegn Liverpool

Aron Einar Gunnarsson var tekin af velli vegna meiðsla í sigri Cardiff á Brighton í gærkvöld. Neil Warnock, stjóri Cardiff, segir þó að ekki hafi verið um neitt alvarlegt að ræða.

Aron var tekinn af leikvelli á 55. mínútu þegar staðan var orðin 2-0 fyrir Cardiff.

Warnock sagði þó að hann hafi verið meira að hugsa um framhaldið heldur en að meiðslin hafi verið svo alvarleg.

„Við vildum ekki taka áhættu með hann. Hann fékk verk í bakið en það verður í lagi með hann, hann þurfti bara smá hvíld,“ sagði Warnock.

Aron sagði sjálfur að hann hafi „fengið gamla góða takið í bakið,“ í samtali við Morgunblaðið í gærkvöld.

Hann sagðist verða klár í leikinn gegn toppliði Liverpool á sunnudaginn.

Cardiff er tveimur stigum frá öruggu sæti í ensku úrvalsdeildinni og á eftir að spila fjóra leiki. Liðin í 16. og 17. sæti eiga hins vegar bæði leiki til góða á Cardiff.