Lögreglan á höfuðborgarsvæðinu þarf fimm hundruð milljónir í auka fjárframlög á ári ef frumvarp til nýrra umferðarlaga nær fram að ganga. Aðallögfræðingur hjá lögreglunni segir breytingar um að lækka leyfileg mörk vínandamagns í blóði ökumanns leiða til töluvert fleiri verkefna hjá lögreglu, sem muni kalla á aukin útgjöld.



Gildandi umferðarlög eru frá 1987 en síðustu tíu ár hefur staðið yfir vinna við endurskoðun þeirra. Sigurður Ingi Jóhannsson, samgönguráðherra mælti fyrir frumvarpinu síðastliðið haust og hefur það tvisvar farið í umsagnarferli. Umsagnarfrestur er nú liðinn og frumvarpið er til meðferðar hjá umhverfis- og samgöngunefnd. Verði lögin samþykkt taka gildi 1. janúar árið 2020.



Í umsögn lögreglustjórans á höfuðborgarsvæðinu kemur fram að frumvarpið muni hafa í för með sér talsvert fleiri verkefni hjá lögreglu.



„Ef markmið laganna fram á að ganga þá verður að tryggja lögreglu nægan mannafla og tæki til þess að við getum náð fram þeim markmiðum sem að er stefnt,“ segir Helgi Valberg Jensson, aðallögfræðingur hjá lögreglustjórnanum á höfuðborgarsvæðinu.



Reglur um ölvunarakstur eru á meðal þess sem breyta á en lækka á leyfileg mörk vínandamagns í blóði ökumanns úr 0,5 í 0,2 prómill.



Helgi segir að eftir breytingarnar muni þurfa að færa ökumenn sem mælast yfir 0,2 á lögreglustöð og framkvæma blóðrannsókn. Þá þurfi að senda sýnin í rannsókn og fá niðurstöður til baka áður en tekin er ákvörðun um sektarinnheimtu eða hvort farið verið fyrir dóm.



„Við sjáum það að málum muni fjölga um 1200, varlega áætlað hjá okkur,“ segir Helgi Valberg.

Bæta þurfi við tveimur lögreglubifreiðum, tveimur mótorhjólum, níu lögreglumönnum, einum starfsmanni í stoðþjónustu og tveimur ákærendum.



„Við teljum að þetta séu um 300 milljónir sem varðar bara það að fær mörkin niður í 0,2,“ segir Helgi Valberg.



Þá telur lögreglan að svæðisbundið bann við notkun nelgdra hjólbarða muni einnig haft í för með sér aukinn kostnað fyrir lögreglu.



„Það þarf þá að hafa eftirlit sem er ekki núna. Þannig það eru aukin verkefni líka. Það má ætla að það sé kostnaðarauki sem er á bilinu 200 til 250 milljónir,“ segir Helgi Valberg.



Alls má því reikna með að kostnaðarauki lögreglunnar á höfuðborgarsvæðinu verði tæplega 500 milljónir króna a ársgrundvelli.



Helgi Valberg segir að nú þegar sé mikið álag í þessum málaflokki.



„Verkefnum er sífellt að fjölga og þau eru að verða stærri og flóknari. En við mætum þeim með þeim mannafla og tækjum sem við höfum yfir að búa og reynum að sinna þessu af bestu getu.“