Tvö mörk Arnórs tryggðu CSKA sigur í Moskvu-slag

Arnór Sigurðsson skoraði bæði mörk CSKA Moskvu í 0-2 útisigri á Spartak Moskvu í rússnesku úrvalsdeildinni í dag.

Staðan í hálfleik var markalaus en á upphafsmínútu seinni hálfleiks kom Arnór CSKA yfir með skoti af stuttu færi eftir barning í vítateig Spartak.

Á 55. mínútu bætti Skagamaðurinn öðru marki við eftir undirbúning Mario Fernandes. Fleiri urðu mörkin ekki og CSKA fagnaði góðum sigri, 0-2.

Arnór fékk heiðursskiptingu í uppbótartíma. Hörður Björgvin Magnússon var ekki í leikmannahópi CSKA.

Arnór er nú kominn með þrjú deildarmörk á tímabilinu, auk tveggja marka í Meistaradeild Evrópu.

CSKA er í 3. sæti deildarinnar með 40 stig. Krasnodar er í 2. sætinu með 41 stig. Liðið vann 1-0 sigur á Krylya Sovetov Samara á heimavelli í dag. Jón Guðni Fjóluson sat allan tímann á varamannabekk Krasnodar.