Stórtap hjá Augsburg

Alfreð Finnbogason og félagar í Augsburg töpuðu illa fyrir Hoffenheim í þýsku Bundesligunni í fótbolta í dag.

Alfreð byrjaði á bekknum en kom inn á fyrir Reece Oxford á 27. mínútu leiksins. Þá var staðan orðin 1-0 fyrir gestina í Hoffenheim en þeir komust yfir á sjöttu mínútu.

Staðan í hálfleik var 1-0 en Ishak Belfodil hefur fengið einhverja vítamínssprautu í hálfleiknum því hann skoraði þrennu í seinni hálfleik og tryggði Hoffenheim 4-0 sigur.

Hoffenheim er í baráttunni um Evrópusæti en Augsburg er í fallbaráttu. Liðið er í 15. sæti, síðasta örugga sætinu, með 25 stig. Stuttgart situr í 16. sæti með 21 stig en sex umferðir eru eftir.