Enski boltinn

Stjarna Man. City lukkunnar pamfíll eftir grimmilegt brot í vináttulandsleik í gær

Óskar Ófeigur Jónsson skrifar
Leroy Sane liggur hér í grasinu eftir brotið.
Leroy Sane liggur hér í grasinu eftir brotið. Vísir/Getty

Aðeins heppni kom í veg fyrir það að Serbinn Milan Pavkov sendi Manchester City leikmanninn Leroy Sane upp á sjúkrahús í gærkvöldi. Það er í það minnsta skoðun þýska landsliðsþjálfarans og örugglega flestra sem hafa séð brotið.

Milan Pavkov fékk beint rautt spjald seint í uppbótatíma fyrir ljótt brot á Leroy Sane í vináttulandsleik Þýskalands og Serbíu. Sane slapp ótrúlega vel en haltraði af velli skömmu síðar.



Tímabilið hjá Leroy Sane hefði auðveldlega getað endað í gærkvöldi. Manchester City á möguleika á að vinna fjórfalt og það hefði verið grátlegt fyrir Þjóðverjann að missa af lokasprettinum.

„Þetta var grimmilegt brot og það á miðju vallarins í vináttulandsleik. Sane var heppinn að sleppa með meiðsli en menn fótbrotna í svona brotum,“ sagði landsliðsþjálfarinn Joachim Löw eftir leikinn.

Löw tók það fram að hann hafi tekið leikmann sinn af velli vegna krampa en ekki vegna afleiðinga af þessu ljóta broti. „Þetta var mjög, mjög ljót brot,“ ítrekaði Joachim Löw en það má sjá hann á blaðamannafundinum hér fyrir neðan.

Milan Pavkov steig ofan á hægri fót Leroy Sane af miklum klunnaskap og átti rauða spjaldið svo sannarlega skilið.

Leikurinn endaði með 1-1 jafntefli eftir að varamaðurinn Leon Goretzka jafnaði metin í seinni hálfleiknum. Löw sagði að serbneski landsliðsþjálfarinn hafi beðið hann afsökunar í leikslok.


Brotið á Leroy Sane. Vísir/Getty


Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.