Úrvalsdeildin setur Tottenham afarkosti

Tottenham mun ekki fá að spila á nýja heimavelli sínum á þessu tímabili nema hann verði tilbúinn fyrir næsta heimaleik. Enska úrvalsdeildin færði félaginu þessi tíðindi í dag samkvæmt frétt The Times.

Í upphafi tímabils ætlaði Tottenham bara að spila fyrstu heimaleikina á Wembley áður en nýi völlurinn yrði tekinn í notkun. Það hefur hins vegar þurft að fresta flutningum aftur og aftur og nú endar Tottenham líklega tímabilið á Wembley.

Forráðamenn ensku úrvalsdeildarinnar hafa verið Tottenham skilningsríkir en nú er komið að þeim tímapunkti þar sem ákveða þarf hvar síðustu fimm heimaleikirnir verða leiknir.

Tottenham á enn eftir að halda tvo prófunarviðburði á vellinum til þess að fá leyfi fyrir því að halda heimaleik og því ólíklegt að þeir nái því.

Næsti heimaleikur Tottenham verður hins vegar ekki fyrr en í apríl svo það er enn möguleiki að ná því.