Lukaku vill spila í fleirum af toppdeildum Evrópu

Belgíski framherjinn Romelu Lukaku íhugar að yfirgefa Manchester United og spila í Ítalíu næsta vetur samkvæmt frétt Sky Sports.

Sky hefur eftir umboðsmanni Lukaku að hann ætli að skoða framtíðina í sumar því hann hafi áhuga á því að prófa að spila í fleirri deildum.



Lukaku kom til United árið 2017 frá Everton og hefur skorað 42 mörk í 90 leikjum fyrir félagið. Hann á rúm þrjú ár eftir af samningi sínum við United.

„Eins og er er hann einbeittur á að klára tímabilið,“ sagði Federico Pastorello, umboðsmaður Lukaku.

„Hann er leikmaður sem vill prófa nýja hluti og nýja menningu. Hann sér ferilinn fyrir sér í mörgum deildum.“

Lukaku er ekki eini leikmaðurinn sem gæti verið á förum frá Old Trafford en Ander Herrera á að vera búinn að komast að samkomulagi við PSG og þá verður Juan Mata samningslaus í sumar.