Enska landsliðið síðasta liðið til að mæta á svæðið

Fjögur landslið keppa í vikunni um það að verða fyrsti Þjóðadeildarmeistarinn í knattspyrnu en lokaúrslit Þjóðadeildar Evrópu fara þá fram í Portúgal.

Undanúrslitaleikirnir eru í kvöld (Portúgal - Sviss) og annað kvöld (England - Holland) og úrslitaleikurinn síðan á sunnudaginn. Allir leikirnir eru sýndir beint á Stöð 2 Sport.

Athygli vekur að enska landsliðið var ekkert að flýta sér á svæðið og kaus frekar að undirbúa sig fyrir leikinn heima á Englandi.

Enska landsliðið kom því ekki til Portúgal fyrr en seinni partinn í dag og er síðasta liðið af fyrrnefndum fjórum liðum til að mæta á svæðið.

Enska liðið æfði á St George's Park í Staffordshire í morgun og flaug síðan í framhaldinu frá Birmingham suður til Portúgals.

Liðið æfir því ekki á Estádio D. Afonso Henriques leikvanginum í Guimaraes fyrir leikinn en leikmenn fá þó að heimsækja leikvanginn. Gareth Southgate heldur síðan blaðamannafund í kvöld.

Enska landsliðið er eina af þessum fjórum sem komst í undanúrslitin á HM í Rússlandi fyrir ári síðan en Holland komst ekki á HM og bæði Portúgal og Sviss duttu út í sextán liða úrslitunum. Portúgal tapaði fyrir Úrúgvæ en Sviss fyrir Svíþjóð.

Enska landsliðið endaði í fjórða sætinu eftir tap á móti Króatíu í undanúrslitunum og tap á móti Belgíu í leiknum um þriðja sætið.