Aron Einar með slitið liðband og missir af landsleikjum

Aron Einar Gunnarsson verður ekki með íslenska landsliðinu í leikjum liðsins gegn Frakklandi og Andorra síðar í mánuðinum. Það var ljóst í dag er í ljós kom að hann er með slitið liðband í ökkla.

Knattspyrnusamband Íslands staðfesti þetta á Twitter-síðu sinni í dag.

Ljóst er að Aron Einar Gunnarsson verður ekki með íslenska landsliðinu í komandi verkefni vegna meiðsla sem hann varð fyrir í leik með félagsliði sínu. Staðfest er að Aron er með slitið liðband í ökkla. Góðan bata, skipper! #fyririslandpic.twitter.com/ESBJlLwwRh

— Knattspyrnusambandið (@footballiceland) October 6, 2019

Aron Einar meiddist þegar hann varð fyrir ljótri tæklingu í leik með félagsliði sínu á föstudag. Hann fór í segulómun í dag og kom þá í ljós hversu alvarleg meiðslin eru.

Á þessari stundu er ekki vitað hversu lengi Aron Einar verður frá en líklegt verður að teljast að hann missi einnig af leikjum íslenska landsliðsins í nóvember, þeim síðustu í undankeppni EM 2020.

Ísland er í þriðja sæti H-riðils undankeppninnar með 12 stig að loknum sex umferðum. Tyrkland og Frakkland eru efst með fimmtán stig hvort.

Strákarnir okkar urðu af mikilvægum stigum er þeir töpuðu fyrir Albaníu ytra í síðasta leik, 4-2, en efstu tvö lið hvers riðils komast áfram í lokakeppni EM 2020.

Verði Ísland ekki í þeim hópi munu okkar menn að öllum líkindum fá annað tækifæri til að komast í lokakeppnina í gegnum umspilsleiki í mars næstkomandi.