KR fer til Noregs og mætir Molde

KR mætir gömlu lærisveinum Ole Gunnar Solskjær í norska liðinu Molde í fyrstu umferð forkeppni Evrópudeildarinnar. Breiðablik mætir Vaduz og Stjarnan spilar við Levadia Tallin frá Eistlandi.

KR byrjar fyrri leikinn úti í Noregi en Blikar byrja heima gegn Vaduz frá Liechtenstein og Stjörnumenn fá Levadia Tallin á Samsungvöllinn í fyrri leiknum.

Molde hefur verið inn og út úr Evrópukeppnum síðustu ár. Liðið fór alla leið í umspil um sæti í riðlakeppni Evrópudeildarinnar á síðasta ári en tapaði þar fyrir Zenit. Besti árangur liðsins er 32-liða úrslit Evrópudeildarinnar tímabilið 2015-16 þar sem Sevilla sló Norðmennina úr leik.

Vaduz varð í sjötta sæti deildarinnar í Liechtenstein á síðasta tímabili en komst í Evrópudeildina sem bikarmeistari. Vaduz hefur orðið bikarmeistari sjö ár í röð. Frá árinu 1995 hefur liðið aðeins tvisvar ekki orðið bikarmeistari, 2012 og 1997.

Liðið hefur því verið fastagestur í Evrópudeildinni síðustu ár og nær alltaf farið áfram úr fyrstu umferðinni.

Gunnleifur Gunnleifsson, markmaður Blika, mun mæta sínu gamla liði en hann fór á láni til Vaduz árið 2009.

Levadia Tallinn lenti í öðru sæti í eistnesku úrvalsdeildinni á síðasta tímabili og er sem stendur í öðru sæti. 

Fyrri leikirnir fara fram fimmtudaginn 11. júlí og þeir seinni viku síðar, 18. júlí.



Hólmar Örn Eyjólfsson og félagar í Levski Sofia mæta Ruzomberok frá Slóvakíu, Hjörtur Hermannsson og Bröndby mæta finnska liðinu Inter Turku. Malmö með Arnór Ingva Traustason innanborðs mætir annað hvort Ballymena United frá Norður-Írlandi eða NSÍ frá Færeyjum.

Steven Gerrard og lærisveinar hans í Rangers mætta annað hvort FC Prishtina eða St. Joseph's FC.