Segja Zlatan hafa áhuga á Everton

Zlatan Ibrahimovic gæti fylgt Carlo Ancelotti til enska úrvalsdeildarfélagsins Everton samkvæmt heimildum breska blaðsins Telegraph.

Carlo Ancelotti verður að öllum líkindum nefndur sem knattspyrnustjóri Everton á næstu dögum ef marka má heimildir enskra fjölmiðla.

Sænski framherjinn er í leit að nýju félagi eftir að hann yfirgaf LA Galaxy og Telegraph segir hann hafa áhuga á því að fara til Everton.

Zlatan hefur unnið með Ancelotti áður, þeir voru saman hjá Paris Saint-Germain, og var Zlatan sagður áhugasamur um að fara til Napólí áður en Ancelotti var látinn fara þaðan í byrjun desember.

Zlatan hefur verið orðaður við Tottenham, AC Milan og Manchester United á síðustu misserum en ekkert af þessum félögum er lengur talið líklegur áfangastaður framherjans.