Svaraði fyrir árásina með sigurmarkinu

Jack Grealish kom mikið við sögu þegar Aston Villa vann Birmingham City, 0-1, í grannaslag á St Andrew's í ensku B-deildinni í dag.

Þegar tíu mínútur voru liðnar af leiknum hljóp stuðningsmaður Birmingham inn á völlinn og kýldi Grealish í andlitið. Árásarmaðurinn var handtekinn og færður í gæsluvarðhald.

Grealish lét árásina ekki hafa áhrif á sig og svaraði fyrir hana með því að skora eina mark leiksins. Það kom á 67. mínútu.

Með sigrinum komst Villa upp í 9. sæti deildarinnar. Liðið er með 51 stig og er fimm stigum frá umspilssæti. Birmingham er hins vegar í 11. sætinu.

Birkir Bjarnason lék síðustu sex mínúturnar fyrir Villa. Hann kom inn á fyrir Grealish, mann dagsins.