Sara Björk fer í myndatöku á morgun

Landsliðsfyrirliðinn Sara Björk Gunnarsdóttir fer í myndatöku á morgun og það skýrist á næstu dögum hversu lengi hún verður frá keppni.

Sara Björk meiddist á hásin í leik Wolfsburg og Lyon í úrslitaleik Meistaradeildar Evrópu í gær og þurfti að fara af velli í seinni hálfleik. Wolfsburg tapaði leiknum 4-1 eftir framlengingu.

Fótbolti.net ræddi við Frey Alexandersson, landsliðsþjálfara, í morgun en hann er staddur úti í Úkraínu þar sem hann var meðal áhorfenda á leiknum.

„Hún fer í myndatöku á morgun og síðan hittir hún sérfræðing í Þýskalandi í næstu viku til að meta alvarleika meiðslanna út frá myndunum. Það er ómögulegt að segja til um það á þessari stundu,“ sagði Freyr við Fótbolta.net.

Ísland á leik í undankeppni HM gegn Slóveníu á Laugardalsvelli 11. júní. Freyr vildi ekki útiloka þáttöku Söru í leiknum en þó er óvíst hvort hún nái honum.