PSG skrefi nær fjórða bikartitlinum í röð

Angel di Maria skaut Paris Saint-German í undanúrslit frönsku bikarkeppninnar í fótbolta í kvöld þegar liðið mætti Marseille í 8-liða úrslitunum.

Argentínumaðurinn kom heimamönnum í PSG yfir í uppbótartíma fyrri hálfleiks og bætti svo við öðru marki sínu og öðru marki PSG strax í upphafi seinni hálfleiksins.

Edinson Cavani gulltryggði svo sigur PSG með marki á 81. mínútu, lokatölur urðu 3-0.

PSG hefur unnið bikarinn síðustu þrjú ár. Liðið gæti mætt Chambly, Les Herbiers eða sigurvegaranum úr viðureign Caen og Lyon í undanúrslitunum.