Fótbolti

43 dagar í HM: Kókaínbræðurnir Maradona og Caniggia

Henry Birgir Gunnarsson skrifar
Maradona og Caniggia. Þvílíkir leikmenn.
Maradona og Caniggia. Þvílíkir leikmenn. vísir/getty
„Þá er þeir báðir komnir af velli, kókaínbræðurnir,“ er lína frá goðsögninni Bjarna Felixsyni sem lifir enn í minni margra Íslendinga.

Þessi orð Bjarna féllu á HM 1994 þegar búið var að taka Argentínumanninn Claudio Caniggia af velli í leik á mótinu. Diego Armando Maradona var þá farinn heim af mótinu eftir að hafa fallið á lyfjaprófi. Caniggia hafði árið áður lent í því að fara í leikbann vegna kókaínnotkunar.

Þeir kókaínbræður náðu tveimur leikjum saman á HM 1994 og eftirminnilegt er þegar Caniggia skoraði tvö mörk í sigri á Nígeríu.

Kókaínbræðurnir Maradona og Caniggia eru tveir af bestu fótboltamönnum í sögu Argentínu en breyskir voru þeir og fannst stundum fram úr hófi gott að skemmta sér. Þá áttu þeir það til að leita í fíkniefnin.

Maradona er auðvitað besti knattspyrnumaður fótboltasögunnar en hans landsliðsferli lauk á HM í Bandaríkjunum. Hann skoraði mark gegn Grikklandi en féll á lyfjaprófi eftir annan leik Argentínu á mótinu og var sendur heim. 

Úr DV.
Sorglegur endir á ótrúlegum landsliðsferli sem taldi 91 leik, 34 mörk og einn heimsmeistaratitil sem kom árið 1986.

Það er stundum sagt að Maradona hafi unnið það mót upp á eigin spýtur. Kannski svolítið sterk fullyrðing en frammistaða Maradona í Mexíkó var vissulega einstök á tímum þar sem leikmenn komust upp með að brjóta mjög grimmt ámönnum.

Markið sem grætti Brassana

Maradona og Caniggia náði einkar vel saman á HM 1990 og eftirminnilegast er þegar Caniggia skoraði sigurmarkið gegn Brasilíu eftir frábæran undirbúning Maradona.

Maradona dró nánast alla vörn Brasilíu í sig. Losaði svo boltann á hárréttum tíma til Caniggia sem sólaði Taffarel í markinu og lagði boltann í netið. Snilld.

Maradona og Caniggia voru miklir vinir. Svo miklir að eiginkona Caniggia hélt að Maradona væri ástfanginn af sínum manni. „Það hlýtur að vera út af síða hárinu og vöðvunum,“ sagði Caniggia.

Flestir sem fylgdust með mótinu árið 1990 gleyma því líklega ekki hvernig Kamerúnar fóru með Caniggia sem bjó yfir ógnarlegum hraða. Hann var sagður hafa hlaupið 100 metrana á 10,7 sekúndum er hann keppti í frjálsíþróttum áður en hann fór alla leið í boltanum.

Eftirminnilegasta tækling HM

Þeir negldu hann niður hvað eftir annað í leiknum og tækling Benjamin Massing eftir stórkostlegan sprett Caniggia gleymist aldrei.

Nokkrir félagar hans voru búnir að reyna að sparka Caniggia niður án árangurs en Massing gekk í verkið af fullu afli. Svo miklu að skórinn fauk af Kamerúnanum í átökunum. Massing lést í desember síðastliðnum en hans er enn minnst fyrir þessa ótrúlegu tæklingu.

Caniggia er í dag orðinn 51 árs gamall í dag en hann lagði skóna á hilluna árið 2004. Hann fékk 13 mánaða bann fyrir kókaínnotkun árið 1993. Framherjinn varð fyrir miklu áfalli árið 1996 er móðir hans svipti sig lífi er hún hoppaði af fimmtu hæð fjölbýlishúss. Hann lék þá ekkert í heila leiktíð meðan hann syrgði móður sína.

Eftir að hafa ekki verið í landsliðliðinu í mörg ár fór Caniggia óvænt með Argentínu á HM árið 2002 en fékk ekki að spila. Honum tókst aftur á móti að næla sér í rauða spjaldið á bekknum í leik gegn Svíum. Fyrsti leikmaðurinn í sögu HM sem fær rautt á HM. Vasklega gert.

Spurning hvort einhver leiki það eftir í Rússlandi?


Tengdar fréttir




Fleiri fréttir

Sjá meira


×