Sigur í fyrsta leik Guðjóns á Indlandi

Guðjón Baldvinsson spilaði sinn fyrsta leik fyrir indverska liðið Kerala Blasters í dag þegar Delhi Dynamos kom í heimsókn.

Guðjón fór til Indlands í vikunni og gekk til liðs við lið Kerala sem David James og Hermann Hreiðarsson þjálfa.

Hann kom inn af varamannabekknum á 65. mínútu þegar staðan var 1-1. Kalu Uche hafði komið Delhi yfir á 35. mínútu úr vítaspyrnu. Uche var aftur á ferðinni í upphafi seinni hálfleiks, þá á röngum enda vallarins og hann skoraði sjálfsmark sem jafnaði leikinn.

Það var svo aftur dæmd vítaspyrna, þetta skiptið var hún dæmd á Delhi. Iain Hume fór á punktinn fyrir Kerala og skoraði, 2-1 sigur lokaniðurstaðan.

Kerala er í fimmta sæti indversku úrvalsdeildarinnar, sjö stigum frá toppliði Bengaluru. Delhi Dynamos er hins vegar á botni deildarinnar.