Solskjær einn af þeim sem kemur til greina

Ole Gunnar Solskjær er einn af þeim sem kemur til greina sem bráðabirgðastjóri Manchester United samkvæmt heimildum Sky Sports.

Jose Mourinho var rekinn frá United í morgun. United ætlar að ráða bráðabirgðastjóra út tímabilið og taka sér nægan tíma í að finna framtíðarstjórann.

Michael Carrick mun stýra æfingum United næstu daga en búist er við að bráðabirgðastjórinn verði ráðinn á næstu tveimur sólarhringum.

Ed Woodward, framkvæmdarstjóri United, vill ráða bráðabirgðastjóra sem þekkir félagið og hefur skilning á sögu, hefðum og menningu félagsins.

Solskjær er stjóri norska liðsins Molde en hann spilaði 235 leiki fyrir Manchester United á sínum tíma og átti meðal annars markið sem tryggði United sigur á Bayern München í úrslitaleik Meistaradeildarinnar árið 1999.

Þá segir Sam Wallace hjá Telegraph að fyrrum aðstoðarmaður Sir Alex Ferguson, Mike Phelan, muni einnig koma inn og verða Solskjær til aðstoðar. 

Næsti leikur United er á laugardaginn gegn Aroni Einari Gunnarssyni og félögum í Cardiff.