Miranda tryggði Brasilíu dramatískan sigur á Argentínu

Danir unnu 2-0 sigur á Austurríki í vináttulandsleik í Herning í kvöld og Belgía gerði 1-1 jafntefli við Holland í Belgíu. Það var svo dramatík í Sádi-Arabíu er Brasilía og Argentína mættust.

Lukas Lerager, framherji Bordeaux, kom Dönum yfir í fyrri hálfleik og í uppbótartíma tvöfaldaði Martin Braithwaite forystuna fyrir Dani. Lokatölur 2-0.

Belgía gerði 1-1 jafntefli við Holland. Dries Mertens kom Belgíu yfir á fimmtu mínútu en á 27. mínútu jafnaði Arnaut Groenevld metin og lokatölur 1-1.

Svíar gerðu einnig 1-1 jafntefli er Slóvakar voru í heimsókn. John Guidetti skoraði mark Svía en Albert Rusnak jafnaði fyrir Slóvaka er sex mínútur lifðu leiks.

Brasilía og Argentína mættust svo í Jeddah í Sádi-Arabíu en Miranda tryggði Brasilíu 1-0 sigur með skallamarki á þriðju mínútu uppbótartíma.