Gary Neville: Gagnrýnin á Sterling viðbjóðsleg

Gary Neville, fyrrum landsliðsmaður Englands og sparkspekingur ITV, segir að gagnrýnin sem Raheem Sterling fékk í hálfleik á leik Svíþjóðar og Englands hafi verið slæm.

Sterling fékk gagnrýni á samfélagsmiðlum því hann fékk færi undir lok fyrri hálfleiksins sem hann klúðraði. Neville segir þó að hann hafi gert margt annað sem skapaði usla.

„Sú meðferð sem Sterling fékk á samfélagsmiðlum í hálfleik var viðbjóðsleg og endurspeglar ekki frammistöðu hans í dag,” sagði Neville í samtali við sjónvarpsstöðina ITV.

„Hann var að hlaupa bakvið Granqvist allan leikinn og var að fá boltann þar. Allt í lagi. Við fengum ekki rjómann á kökuna sem var mark en þetta var frábær frammistaða.

„Þetta lið! Allar frammistöðurnar á mótinu hafa verið yfirvegaðar og skipulagðar. Gegn Kólumbíu var þetta fullkominn frammistaða fram á 90. mínútu.”

„Já, þeir fengu á sig mark og misstu aðeins taktinn í tíu mínútur en þeir unnu það til baka og náðu völdunum aftur. Þetta er mest þroskaða og rólegasta enska lið sem ég hef séð í lengri, lengri tíma,” sagði Neville.