Klopp: Robertson týndi fyrirgjöfum sínum í Skotlandi en fann þær aftur í kvöld

Jurgen Klopp var að vonum hæstánægður með frammistöðu sinna manna í Liverpool sem rúlluðu Porto upp í fyrri leik liðanna í 16-liða úrslitum Meistaradeildar Evrópu.

Liverpool vann leikinn 0-5 og gerði Sadio Mane meðal annars þrennu fyrir Liverpool.

„Þetta var mjög fagmannlegt. Mjög þroskað og á réttum tímum aggressívt,“ sagði Klopp um frammistöðuna.

„Leikurinn var ekki auðveldur, við þurftum að leggja okkur fram, en strákarnir nutu þess að spila og það er það mikilvægasta. Öll mörkin fimm voru frábær og margir leikmannanna voru frábærir.“

„Robbo [Andrew Robertson] var framúrskarandi. Hann fann loksins fyrirgjafirnar sínar aftur, hann týndi þeim örugglega í Skotlandi eða einhverstaðar,“ sagði léttur Jurgen Klopp.