Mourinho telur sig ekki geta fengið leikmann í janúar

Jose Mourinho er ekki viss um að hann geti styrkt lið Manchester United í janúarglugganum því United hafi ekki sama aðdráttarafl og áður.

„Í allri hreinskilni þá held ég að við munum ekki fá nýja leikmenn,“ sagði Mourinho fyrir helgina.

„Ef það kemur einhver þá held ég að það verði bara einn, ég get ekki séð okkur ná í fleiri.“

Hann er sagður vilja styrkja varnarlínu United eftir að hafa mistekist að fá varnarmann í sumar. Hann segir stuðningsmenn þó þurfa að halda væntingum sínum í skefjum.

„Við þurfum að gera betur en við höfum gert, en það er ekki hægt að bera okkur saman við hvernig United var á markaðinum á árum áður. Ekki bara því það United var frábært heldur einnig því þá var mikill munur á United og hinum félögunum.“

Forráðamenn United eru sagðir tilbúnir að opna veskið í janúar en geta þó ekki eytt „fáránlegum fjárhæðum,“ og geta ekki verslað fyrsta flokks leikmenn að mati Mourinho.