Fjarvera Neymar og Mbappe breytti engu fyrir PSG

PSG er áfram með fullt hús stiga í frönsku úrvalsdeildinni eftir 1-0 sigur á Toulouse á heimavelli í París í kvöld.

Stórstjörnurnar Neymar og Kylian Mbappe voru ekki með vegna meiðsla en þeir meiddust í landsliðsverkefni í síðustu viku.

Spurning er hvort að þeir séu meiddir eða hafi einfaldlega verið hvíldir fyrir stórleikinn gegn Liverpool í Meistaradeildinni í vikunni þar sem franska liðið þarf þrjú stig.

Eina mark leiksins skoraði Úrúgvæinn Edinson Cavani á níundu mínútu leiksins eftir undirbúning Adrien Rabot. Lokatölur 1-0.

PSG er með 42 stig eftir fyrstu fjórtán leikina í Frakklandi og er nú þegar komið með fimmtán stiga forskot í frönsku deildinni. Ótrúlegir yfirburðir.