Elías og Mikael spiluðu báðir í sigri

Þeir Elías Már Ómarsson og Mikael Anderson voru í byrjunarliði Excelsior í hollensku deildinni í dag þegar liðið bar sigurorð á Emmen 2-1.

 

Fyrir leikinn var Excelsior í fjórtánda sæti deildarinnar með tólf stig á meðan andstæðingar þeirra voru í tólfta sæti með þrettán stig.

 

Það var markalaust í fyrri hálfleiknum en í þeim seinni komu liðsmenn Emmen ákveðnir út og skoruðu strax á 47. mínútu en það var Anco Jansen sem skoraði markið.

 

Það tók þó Excelsior ekki langan tíma að jafna metin en jöfnunarmarkið kom á 60. mínútu og var það Ali Messaoud sem skoraði.

 

Allt stefndi í það að liðin deildu stigunum á mili sín en svo var ekki því á 89. mínútu skoraði Ryan Koolwijk og tryggði Excelsior sigurinn.

 

Fleiri mörk voru ekki skoruð í þessum leik en þeir Elías og Mikael voru báðir teknir af velli fyrir leikslok. Eftir leikinn er Excelsior með fimmtán stig í ellefta sæti.