Úrslit dagsins vatn á myllu Juventus

Lazio og AC Milan gerðu 1-1 jafntefli í stórleik umferðarinnar í ítölsku úrvalsdeildinni en Napoli tapaði einnig mikilvægum stigum í toppbaráttunni.

Staðan var markalaus allt þangað til er stundarfjórðungur var eftir milli Lazio og Milan en Franck Kessie virtist þá vera að tryggja Milan sigurinn.

Það varð þó ekki raunin því í uppbótartíma jafnaði Joaquin Correa metin fyrir Lazio og lokaniðurstaðan jafntefli á Ólympíuleikvanginum í Róm.

Lazio er í fjórða sætinu með 23 stig en Mílan er sæti neðar með 22 stig. Juventus er með örygga forystu á toppi deildarinnar en meistararnir eru með 37 stig.

Napoli mistókst að minnka bil Juventus niður í sex stig er liðið gerði markalaust jafntefli við Chievo Verona á heimavelli. Napoli nú átta stigum frá Juventus.