Tífalt meiri losun frá álverum í Kína en Íslandi

Sú þróun að álframleiðsla í heiminum færist í auknum mæli til Kína er ekki góð með tilliti til loftslagsmála, að sögn Magnúsar Þórs Ásmundssonar, forstjóra Fjarðaáls. Á ársfundi Umhverfisstofnunar sagði hann losun frá kínverskum álverum tífalt meiri en frá þeim íslensku.

Loftslagsbreytingar eru þema ársfundar Umhverfisstofnunar að þessu sinni en Magnús Þór færði í erindi sínu þar rök fyrir því að ál væri hluti af lausn loftslagsvandans. Björt Ólafsdóttir, umhverfisráðherra, hafði sagt að það gæti ekki verið sérstakt framlag Íslands í loftslagsmálum að laða mengandi stóriðju til landsins í opnunarávarpi fundarins.

Áður hafði Vanda Úlfrún Liv Hellsing, sérfræðingur stofnunarinnar, lýst því hvernig losun frá iðnaði á Íslandi hefur aukist um 112% á tímabili Kyoto-bókunarinnar og losun almennt um 28%. Ýmislegt bendi til þess að Ísland þurfi að kaupa sér losunarheimildir til þess að standast skuldbindingar sínar á síðara tímabili Kyoto sem lýkur árið 2020.

Þá hafði Árni Finnsson, formaður Náttúruverndarsamtaka Íslands, bent á að þrátt fyrir háleit markmið Parísarsamkomulagsins um að halda hlýnun jarðar við 1,5°C þá hrökkvi boðaðar aðgerðir ekki til. Þannig þyrfti markmið Evrópusambandsríkja að vera 55% samdráttur losunar gróðurhúsalofttegunda fyrir 2030 en ekki 40%.

Meira en helmingur álframleiðslunnar í Kína

Magnús Þór lýsti því hins vegar hvernig dregið hefði úr hlutfallslegri losun gróðurhúsalofttegunda við framleiðslu áls á undanförnum árum og hvernig ál sem slíkt gæti átt þátt í að minnka orkunotkun og útblástur.

Þannig gæti eitt kíló af áli í stað stáls í bíl sparað 20 kíló af koltvísýringslosun á líftíma Íslands. Að sama skapi gætu 20 milljónir tonna af áli í samgöngutækjum sparað 500 milljón tonn af losun eða hundrað milljarða lítra af olíu.

Þá væri ál endurnýtanlegur málmur sem tapaði hvorki eiginleikum né gæðum við endurvinnslu. Þannig væru 75% af áli sem framleitt hafi verið í heiminum enn í notkun.

Eiginleikar álsins geti ennfremur minnkað eldsneytisnotkun vegna þess hversu létt það er og dregið úr orkunotkun í raftækum eins og tölvum vegna þess hversu vel það leiðir hita.

Varaði Magnús Þór við þeirri þróun að álframleiðsla færðist í auknum mæli til Kína. Meira en helmingur heildarframleiðslu áls í heiminum fer nú fram í Kína þar sem orka er fyrst og fremst framleidd með brennslu brúnkola. Heildarlosun gróðurhúsalofttegunda við framleiðsluna í Kína sagði hann tífalt meiri en á Íslandi þar sem raforka væri framleidd með vatnsafli.

„Þetta er ekki góð þróun, sérstaklega með tilliti til loftslagsmála,“ sagði forstjóri Fjarðaáls.