Allir kvaddir með himneskri mótettu Mozarts

Árvissir aðventutónleikar Blásarakvintetts Reykjavíkur og félaga, sem þeir nefna Kvöldlokkur á jólaföstu, verða haldnir í Fríkirkjunni við Tjörnina klukkan 20 annað kvöld, miðvikudag.

„Við leikum að venju hljómfagrar blásaraserenöður eða kvöldlokkur eftir meistara klassíska tímabilsins í tónlist,“ segir Einar Jóhannesson klarínettuleikari og nefnir til sögunnar tónskáldin Haydn, Mozart, Beethoven og fleiri spámenn. „Þetta er tónlist full af heiðríkju og gleði sem var gjarnan leikin utan dyra í lystigörðum borga eins og Vínar og Prag og þar fékk almenningur fyrst tækifæri til að njóta slíkrar tónlistar í fögru umhverfi.“

Kvöldlokkurnar í Fríkirkjunni eiga sinn fasta aðdáendahóp að sögn Einars. „Sumir finna ekki jólastemninguna og setja ekki upp útiljósaseríuna sína fyrr en aðventutónleikarnir okkar eru yfirstaðnir,“ segir hann og getur þess að í lok tónleikanna séu allir kvaddir með himneskri mótettu Mozarts, Ave verum corpus sem engan láti ósnortinn.