Biggi lögga um Kópavogshæli: „Það er auðvelt að setjast í dómarasætið og benda fingri“

Birgir Örn Guðjónsson, betur þekktur sem Biggi lögga, segir að allar kynslóðir virðist falla í þá gryfju að taka einhvern ákveðinn samfélagshóp út fyrir svigann og takmarka mannréttindi þeirra.

Þetta segir Birgir í kjölfar frétta þess efnis að börn sem vistuð voru á fullorðinsdeildum Kópavogshælis á árunum 1952-1993 hafi þurft að þola líkamlegt og andlegt ofbeldi. Hann bendir á það sem eitt sinn þótti eðlilegt er óeðli dagsins í dag og spyr hvernig menn muni horfa aftur til okkar tíma eftir nokkra áratugi.

„Enn eina ferðina fáum við fréttir af því hversu gallað samfélagið okkar hefur verið Allskonar ógeð þagað í hel og óþvera sópað undir teppið,“ skrifa Birgir á Facebook síðu sinni.

„Hvernig stendur á því að einstaklingar hafi verið sendur á vistheimili í óbyggðum þar sem vitað var að ofbeldi átti sér stað? Hvernig stendur á því að stofnun þar sem fólk var beitt ofbeldi og kúgun hafi fengið að starfa, og það til ársins 1993? Nítjánhundruðníutíuogþrjú! Árið sem Jurassic Park kom út og Páll Óskar var orðinn heitasta poppstjarnan. Við erum ekki endilega að tala um einhverja fjarlæga tíma. Hvernig getur heil þjóð verið svona blind og fáfróð? Var samfélagið í alvöru bara fullt af fíflum?“

Sjá einnig: Vistmenn á Kópavogshæli máttu þola ofbeldi og vanlíðan



Hann segir að fíflin þá hafi ekki verið fleiri en þau eru í dag, heldur hafi samfélagið verði stærsta fíflið. Samfélagið hafi verið fast í hlekkjum ákveðins tíðaranda og fáfræði. 

„Það réttlætir ekki nokkurn skapaðan hlut en svona var þetta engu að síður. Gömlu konurnar sem skömmuðu ungu starfsstúlkurnar á Kópavogshæli fyrir að lakka neglurnar á vistmönnunum eða læstu þá inni voru ekki vondar konur. Þær áttu sín börn, barnabörn og afkomendur sem hugsa hlýtt til þeirra enn í dag.”

Hann segir að ef fólki finnist fortíðin full af fíflum þá sé nútímafólk enn meiri fífl ef það ærir ekki af fortíðinni. 

„Ef við lærum ekki að allir eiga sama rétt á mannsæmandi lífi. Allir. Ef við lærum ekki að ofbeldi er aldrei réttlætanlegt. Ef við lærum ekki að fordómar og fáfræði eru eitur í æðum samfélagsins.“

Sjá einnig: Drengur sem vistaður var á Efra-Seli var látinn éta upp eigin ælu

Hann segir að það eina sem fólk geti gert til að tryggja að nöfn sín standi ekki við slíkar fréttir er að koma fram við alla af virðingu.

„Það sem eitt sinn þótti eðlilegt er óeðli dagsins í dag. Hvernig munum menn horfa á okkar tíma eftir þrjátíu, fjörutíu eða fimmtíu ár? Mun eitthvað norm nútímans verða að hneykslismáli í framtíðinni? Við vitum það ekki. Við getum samt tryggt að okkar nöfn standi ekki við slíkar frétir. Við gerum það með því að koma fram við alla með sömu virðingu. Sama hvað fólk heitir, hvaðan það kemur, hvernig það lítur út, hvaða kyn það er, hvaða kynferði það hefur, hvaða tungumál það talar, hvað það er gamalt, hverju það trúir, hvernig það hreyfir sig eða hvernig það er á litin,“ skrifar hann.

„Aftur og aftur í sögunni virðast heilu kynslóðirnar falla í sömu gryfjuna. Það er að taka einhvern hóp út fyrir svigann og mínusa frá þeim mannréttindi. Hvernig munum við standa okkur? Hvernig verður okkar minnst?“