Sýknaður af ákæru um skattsvik í vitnalausri aðalmeðferð: „Við teljum þetta augljóslega vera rangan dóm“

Embætti héraðssaksóknara hefur áfrýjað sýknudómi yfir manni og tveimur fyrirtækjum hans vegna gruns um stórfelld brot á skattalögum. Björn Þorvaldsson, saksóknari hjá héraðssaksóknara, segir í samtali við fréttastofu að málinu hafi verið áfrýjað og að það verði að öllum líkindum tekið fyrir á nýju ári, þegar millidómstig Landsréttar tekur til starfa.

„Við teljum þetta augljóslega vera rangan dóm,“ sagði Björn í samtali við fréttastofu.

Héraðsdómur Suðurlands sýknaði manninn fyrr í mánuðinum vegna skorts á gögnum. Ákæran var til komin vegna vangreiðslu á virðisaukaskatti og staðgreiðslu launa sem námu samtals um 19 milljónum króna.

Maðurinn neitaði sök þegar málið var þingfest og mætti síðan ekki þegar aðalmeðferð fór fram í Héraðsdómi Suðurlands í Vestmannaeyjum en hann hafði engin lögmæt forföll. Í dómnum kemur fram að „skv. 3. mgr. 108. gr. laga nr. 88/2008 getur ákærandi lagt fyrir lögreglu að sækja ákærða eða færa hann síðar fyrir dóm með valdi ef þörf krefur, enda hafi ákærði ekki lögmæt forföll, en ekki kom fram neitt af því tagi.“

„Menn voru þarna komnir til Vestmannaeyja allir saman og ákærði ekki mættur, þannig að málið var klárað,“ segir Björn aðspurður út í það hvers vegna ákæruvaldið ákvað að færa manninn ekki fyrir dóm þrátt fyrir að hafa ekki lögmæt forföll.

Dró framburð sinn til baka

Í skýrslugjöf hjá héraðssaksóknara kvaðst maðurinn sjálfur bera ábyrgð á skattskilum og fjármálastjórn beggja félaga sinna. Sá framburður var dreginn til baka síðar þegar maðurinn benti á tvo aðra menn og kvað ábyrgðina vera í þeirra höndum.

Ákæruvaldið og verjandi sáu ekki ástæðu til að óska eftir framburði vitna við meðferð málsins í héraðsdómi. Á ákæruvaldinu hvílir sönnunarbyrði um sekt ákærða og atvik sem telja má honum í óhag. Þrátt fyrir það var aðkoma þessara tveggja manna, sem ákærði benti á, ekki tekin fyrir við málsmeðferð „þó að tilefni hafi verið til,“ eins og fram kemur í dómnum.

Björn segir að það hafi verið mat ákæruvaldsins að kalla ekki til vitni í aðalmeðferð málsins, staðreyndir þess lægju skýrt fyrir í gögnum málsins.

„Það verður hægt að gera það fyrir Landsrétti þegar þar að kemur, ef það telst þörf á því.“

Segir í niðurstöðu dómsins:

„Gegn neitun ákærða hefur því ekki verið færð fram sönnun um sekt ákærða sem ekki verði vefengd með skynsamlegum rökum og verður hann því sýknaður af öllum kröfum ákæruvalds í málinu.“

Eins og áður segir hefur embætti héraðssaksóknara áfrýjað málinu og verður það að öllum líkindum tekið fyrir á nýju ári.