Móðir árásarmannsins í London harmi slegin vegna ódæðisverka sonar síns

Janet Ajao, móðir Khalid Masood, árásarmannsins sem varð fjórum að bana við þinghúsið í London á miðvikudag, er harmi slegin eftir ódæðisverk sonar síns.

„Ég hef fellt mörg tár vegna fórnarlamba þessa ódæðis sonar míns,” segir Aajo í samtali við bresku fréttaveituna BBC.

Hún vill þá koma því á framfæri að hún hafi ekki með nokkru móti stutt aðgerðir hans.

„Ég vil segja það svo það sé alveg ljóst að ég hvorki fyrirgef verknað hans né styð þann málstað sem leiddi til þess að hann framdi þetta ódæðisverk.” 

Þrír aðilar létust eftir að hafa orðið fyrir bíl Masood og þá myrti hann lögreglumann áður en hann sjálfur var skotinn til bana.  Auk þeirra sem létust særðust um 40 manns í árásinni.  

Hryðjuverksamtök sem kenna sig við íslamska ríkið hafa lýst yfir ábyrgð á árásinni en lögregla hefur enn sem komið er ekki fundið neitt sem tengir Masood við samtökin.