Fótboltahátíð í skötuveislunni │ Myndband

Níu leikir eru á dagskrá í ensku úrvalsdeildinni í dag þegar nítjánda umferðin klárast.

Dagurinn byrjar á heimsókn Englandsmeistaranna á Goodison Park til Gylfa Þórs Sigurðssonar og félaga í hádeginu. Fyrri viðureign þessara liða í haust endaði með 2-0 sigri Chelsea.

Everton hefur ekki tapað deildarleik síðan Sam Allardyce tók við liðinu, eða síðan 26. nóvember. Enn fremur hefur liðið ekki tapað á Goodison Park síðan Arsenal kom í heimsókn í október og getur því náð í fimmta heimasigurinn í röð með sigri í dag.

Englandsmeistararnir hafa unnið sex af tíu leikjum sínum á útivelli í deildinni til þessa og munu veita Gylfa og félögum hörkuleik. Chelsea situr í þriðja sæti deildarinnar, og situr þar áfram sama hver úrslit leiksins verða þar sem liðið kemst ekki upp fyrir Manchester United í öðru sætinu nema fara með tíu marka sigur. Everton kemst hins vegar upp fyrir Leicester í áttunda sætið fari þeir með sigur.

Sex viðureignir fara fram klukkan þrjú. Nýliðar Brighton taka á móti Watford, en bæði lið eru um miðja deild. Liðin gerðu markalaust jafntefli á Vicarage Road í ágúst.

Meistaraefnin í Manchester City geta unnið sautjánda deildarleikinn í röð fari þau með sigur á Bournemouth á Etihad vellinum í Manchester. Bournemouth er í baráttunni við fallsvæðið, situr í sextánda sæti með sextán stig og gæti dottið niður í fallsæti með óhagstæðum úrslitum í dag.

Southampton mætir Huddersfield á St. Mary's leikvangnum í Southampton. Liðin eru í 11. og 12. sæti deildarinnar og munar þremur stigum á þeim. Fari Southampton með sigur munu þau skipta um sæti þar sem markatala Huddersfield er mun óhagstæðari, -14 á móti -7 hjá Southampton.

Það verður fallslagur í Stoke þegar West Bromwich Albion mætir í heimsókn. Stoke situr í 17. sætinu með 16 stig, tveimur stigum og tveimur sætum fyrir ofan West Brom.

Stjóralaust Swansea fær Crystal Palace í heimsókn. Palace, sem vermdi botnsætið sem Swansea situr nú í lengi framan af, hefur snúið gengi sínu við eftir ráðningu Roy Hodgson og er nú komið upp í 14. sæti deildarinnar. Munurinn niður á botninn er þó aðeins fimm stig. Svanirnir fóru með 2-0 sigur á Selhurst Park í ágúst, en formið er örnunum í hag í þetta skiptið.

David Moyes fær Rafael Benitez í heimsókn til Lundúna þegar West Ham tekur á móti Newcastle. Bæði lið eru í baráttunni í neðri helmingi deildarinnar, þar sem pakkinn er þéttur og sigur getur breytt miklu. West Ham er í 15. sæti en gæti farið upp í 12. með sigri og hagstæðum úrslitum. Newcastle situr í 18. sæti en gæti að sama skapi farið upp í það 14.

Síðdegis tekur Jóhann Berg Guðmundsson svo á móti Harry Kane þegar Tottenham kemur í heimsókn til Burnley á Turf Moor. Liðin skildu jöfn, 1-1, á Wembley fyrr á tímabilinu. Aðeins eitt sæti og eitt stig aðskilur liðin, Burnley í 6. sæti með 32 stig og Tottenham í því sjöunda með 31.

Af þeim níu leikjum sem hafa verið leiknir á Turf Moor til þessa hafa aldrei verið skoruð fleiri en tvö mörk, og oftast enda leikirnir 1-0. Það er því ekki von á mikilli markaveislu, og þar hjálpar ekki að Tottenham hefur bara skorað eitt mark í síðustu þremur útileikjum. Það er hins vegar meira en mánuður síðan Tottenham skoraði ekki í deildarleik, svo því telst líklegt að Burnley þurfi að taka sig til og skora tvö mörk til að sigra í dag.

Lokaleikur dagsins er svo leikur Leicester og Manchester United á King Power vellinum í Leicester. Bæði lið töpuðu í deildarbikarnum í vikunni og vilja því ná í sigur áður en jólin ganga í garð.

United sigraði 2-0 á Old Trafford þegar liðin mættust í þriðju umferðinni. Jose Mourinho situr með sína menn í öðru sætinu og mun sitja þar áfram sama hvernig fer, nema Chelsea nái þessum 10 marka sigri á Everton. Leicester er í áttunda sætinu með 26 stig.

Upphitunarmyndband fyrir daginn má sjá í spilaranum hér að ofan.

Leikir dagsins:

12:30 Everton - Chelsea, bein útsending á Stöð 2 Sport 2

15:00 Brighton - Watford

15:00 Manchester City - Bournemouth, í beinni textalýsingu á Vísi

15:00 Southampton - Huddersfield

15:00 Stoke - West Bromwich Albion

15:00 Swansea - Crystal Palace

15:00 West Ham - Newcastle

17:30 Burnley - Tottenham, bein útsending á Stöð 2 Sport

19:45 Leicester - Manchester United, bein útsending á Stöð 2 Sport