Mega ekki fullyrða að ísinn sé gerður af ást

„Við gátum ekki sannað að ísinn væri framleiddur af ást,“ segir Gunnar Logi Malmquist, eigandi ísbúðarinnar Ísleifs heppna. Heilbrigðiseftirlit Reykjavíkur stöðvaði á dögunum dreifingu á rjómaís frá fyrirtækinu, á þeim forsendum að fyrirtækið skorti framleiðsluleyfi til að selja ís í verslanir. Þá gerði eftirlitið athugasemdir við fullyrðingar á umbúðum sem fyrirtækið gat ekki fært sönnur á. Á meðal þeirra fullyrðinga var að ísinn væri „framleiddur af ást“.

Gunnar Logi Malmquist Einarsson, einn stofnenda fyrirtækisins, segir að aðgerðir heilbrigðiseftirlitsins hafi komið þeim á óvart og málið hafi komið upp á erfiðum tíma fyrir fyrirtækið, sem opnaði ísbúð 19. ágúst síðastliðinn. „Þetta hafði mikil áhrif og kom á mjög leiðinlegum tíma,“ segir hann. Vegna þessa hafi þurft að farga tæplega 50 lítrum af rjómaís.

Aðalástæðan, að sögn Gunnars, fyrir því að ísinn var innkallaður var að fyrirtækið hafði ekki leyfi til að framleiða í ísbúðinni ís til að selja í verslanir. „Núna notum við tilraunaeldhúsið hjá MATÍS og framleiðum þar ísinn fyrir verslanirnar,“ segir hann.

Þær upplýsingar fengust frá fulltrúa hjá Heilbrigðiseftirliti Reykjavíkur að kjarninn í reglum um merkingar á umbúðum sé að þær séu ekki villandi fyrir neytendur. Umrætt fyrirtæki hafi ekki getað fært sönnur á þær fullyrðingar sem fram komu á umbúðunum. Þar eigi aðeins að birta staðreyndir um vörur, svo neytendur geti kynnt sér innihald þeirra. Um sé að ræða reglugerð á vegum Evrópusambandsins sem innleidd hafi verið hér. Fullyrðingin um ástina væri ein og sér ekki tilefni til að stöðva dreifingu á vörunnar.

Á límmiða, sem límdur er á umbúðir íssins, var gerður samanburður á ísnum frá Ísleifi heppna og „hefðbundnum ís“. Á honum kom fram að í hefðbundinn ís væru oft notuð E-efni, mjólkurduft væri notað í stað lífrænnar mjólkur Ísleifs heppna og að oft væri ekki notaður rjómi í rjómaís. Það gerði Ísleifur heppni hins vegar. „Við sögðum frá því að við notum salt frá Saltverki á meðan aðrir nota borðsalt. Svo var fullyrt að ísinn væri framleiddur af ást á meðan hefðbundinn ís væri fjöldaframleiddur,“ útskýrir Gunnar.

Ísleifur heppni er fjölskyldufyrirtæki sem starfrækir ísbúð á Hlemmi og selur ís í Fjarðarkaupum, Melabúðinni og Frú Laugu. Gunnar rekur fyrirtækið með föður sínum en þrjár systur hans eru einnig í eigendahópnum. Gunnar, sem er matreiðslumaður, segir að rjómaísinn frá fyrirtækinu njóti þeirrar sérstöðu að vera frystur með fljótandi köfnunarefni. Í honum sé miklu minna loft en í ís sem sé frystur á hefðbundinn máta. Ísinn sé bæði þéttari og bragðmeiri fyrir vikið. Hann segir mikilvægt fyrir rekstur fyrirtækisins að selja ís í búðum, sérstaklega yfir vetrarmánuðina.