Reykjanesbær vinni kerfisbundið að því að uppræta kynferðislega áreitni

„Hvers kyns þöggun eða afneitun gagnvart þessu málefni verður ekki liðin og bera stjórnendur, bæjaryfirvöld og aðrir þeir sem kunna að verða varir við framkomu af þessu tagi, sameiginlega ábyrgð á að uppræta hana,“ segir í yfirlýsingu allra bæjarstjórnarmanna í Reykjanesbæ um aðgerðir gegn einelti, kynbundinni og kynferðislegri áreitni.

„Í ljósi þeirrar mikilvægu umræðu sem átt hefur sér stað í samfélaginu undanfarin misseri þar sem fjöldi kvenna hefur stigið fram og lýst reynslu sinni undir myllumerkinu #metoo vilja bæjaryfirvöld í Reykjanesbæ árétta og renna styrkari stoðum undir þá afdráttarlausu stefnu að kynbundin og kynferðisleg áreitni eða ofbeldi af nokkru tagi er ekki liðin á vinnustöðum sveitarfélagsins,“ segir í yfirlýsingunni.

Vitnað er til starfsmannastefnu Reykjanesbæjar þar sem fram kemur að leggi starfsmaður annan samstarfsmann í einelti eða sýni  honum kynferðislega áreitni, teljist hann  brjóta grundvallarreglur samskipta á vinnustað. Það geti leitt til áminningar og brottreksturs.

„Ábyrgð Reykjanesbæjar sem vinnuveitanda nálægt eitt þúsund einstaklinga er afar rík. Leggja bæjaryfirvöld því ríka áherslu á að stjórnendur í sveitarfélaginu fái þjálfun og aðstoð við að greina og koma með kerfisbundnum hætti í veg fyrir kynferðislega og kynbundna áreitni í sínu nærumhverfi,“ segir bæjarstjórnin. –