Innlent

Utankjörfundaratkvæðin umtalsvert fleiri en á sama tíma í fyrra

Atli Ísleifsson skrifar
Með aðsendum atkvæðum er fjöldi atkvæða rúmlega 33 þúsund.

Utankjörfundaratkvæðagreiðsla á höfuðborgarsvæðinu hefur farið fram í Smáralind.
Með aðsendum atkvæðum er fjöldi atkvæða rúmlega 33 þúsund. Utankjörfundaratkvæðagreiðsla á höfuðborgarsvæðinu hefur farið fram í Smáralind. Vísir/Anton
Heildarfjöldi þeirra sem mætt hafa á staðinn og kosið utan kjörfundar á landinu er 29.150 nú skömmu fyrir klukkan 11 í dag.

Þetta segir Bergþóra Sigmundsdóttir, sviðsstjóri þinglýsinga og leyfasviðs hjá Sýslumanninum á höfuðborgarsvæðinu. Hún segir að með aðsendum atkvæðum sé fjöldi atkvæða rúmlega 33 þúsund.

Utankjörfundaratkvæðagreiðsla á höfuðborgarsvæðinu hefur farið fram í Smáralind og segir Bergþóra að mikill straumur fólks hafi lagt leið sína þangað.

Hún segist ekki vera með nákvæmar tölur um hve margir hafi kosið utan kjörfundar á sama tíma fyrir þingkosningarnar í fyrra en að þeir séu talsvert fleiri nú. Hún segir að ástæðurnar kunni að vera margvíslegar – nú sé rjúpuhelgi og þá virðast hlutfallslega fleiri úr Kópavogi hafa kosið utan kjörfundar en á sama tíma í fyrra.

Vetrarfrí er nú í skólum í Kópavogi, Garðabæ og Hafnarfirði sem kann sömuleiðis að hafa áhrif á hvort íbúar þar kjósi utan kjörfundar.

Alls greiddu 31.558 atkvæði utan kjörfundar í alþingiskosningunum 2016.




Fleiri fréttir

Sjá meira


×