Erlent

Búast við handtöku vegna Rússarannsóknarinnar

Samúel Karl Ólason skrifar
Donald Trump og Robert Mueller.
Donald Trump og Robert Mueller. Vísir/Getty
Búist er við því að fyrsta handtakan verði framkvæmd vegna rannsóknar Robert Mueller, sérstaks saksóknara bandaríska dómsmálaráðuneytisins, á afskiptum Rússa í forsetakosningunum í Bandaríkjunum í fyrra í dag (mánudag). Ákærudómstóll samþykkti fyrstu ákærurnar vegna rannsóknarinnar á föstudaginn.

Ekki er vitað fyrir hvað er ákært né hver verði ákærður. Chris Christie, ríkisstjóri New Jersey, fyrrverandi saksóknari, sem var mikill stuðningsmaður Trump sagði í viðtali á CNN að hver sá sem ákæran beindist gegn ætti „að hafa áhyggjur“.



Mueller rannsakar tilraunir rússneskra stjórnvalda til að hafa áhrif á forsetakosningarnar í Bandaríkjunum í fyrra og einnig hvort að þau hafi átt í samráði við forsetaframboð Donalds Trump.

Sjá einnig: Fyrstu ákærurnar í Rússarannsókninni



Leyniþjónustur Bandaríkjanna og aðrar öryggisstofnanir komust að þeirri niðurstöðu í janúar að Rússar hefðu haft afskipti af kosningunum með því markmiði að hjálpa Donald Trump að sigra Hillary Clinton. Til þess hefðu þeir meðal annars beitt áróðri og tölvuárásum.

Donald Trump hefur að mestu sagt þetta vera rangt. Undanfarna daga hefur hann þar að auki tíst mikið um að Clinton hafi í raun starfað með yfirvöldum í Rússlandi. Bandamenn forsetans hafa reynt að draga úr mikilvægi mögulegrar handtöku fyrir mikilvæga viku fyrir Trump.

Til stendur að opinbera val forsetans um hver muni stýra Seðlabanka Bandaríkjanna, lyfta hulunni af nýju skattafrumvarpi og einnig hefst tólf daga ferðalag Trump um Asíu í vikunni.

Eins og Politco bendir á lýsti Trump þó ítrekað yfir vanþóknun sinni á rannsókn Mueller í gær.

Forsetinn hefur ítrekað kallað rannsóknina nornaveiðar og kallar eftir því að repúblikanar „GERI EITTHVAÐ!“ Þá segist hann telja að það sé ekki tilviljun að þessar fregnir berist í sömu viku og repúblikanar ætla að opinbera skattafrumvarpið.

Trump sagði einnig að réttast væri að rannsaka Hillary Clinton og sagði repúblikana reiða eftir að í ljós kom að framboð hennar hefði komið að fjármögnun Steele-skýrslunnar svokölluðu.

Sjá einnig: Trump segist fórnarlamb falskrar skýrslu

Hann vísaði einnig til ásakana um að Clinton hefði sem utanríkisráðherra selt Rússlandi um fimmtung af Úraníumi Bandaríkjanna sem tilefni til rannsóknar. Þær ásakanir voru þó hraktar fyrir löngu síðan af mörgum miðlum.



Lögfræðingur Hvíta hússins sagði í gær að tíst Trump hefðu ekkert með aðgerðir Robert Mueller að gera.

„Þvert á það sem margir hafa gefið í skyn, tengjast ummæli forsetans ekki rannsókn sérstaks saksóknara, sem forsetinn starfar áfram með,“ sagði Ty Cobb, lögfræðingur Hvíta hússins.

Nokkrir sem koma til greina

Fréttaveitan Reuters hefur farið yfir rannsókn Mueller og hverjir hafi verið fengnir í yfirheyrslur. Reince Priebus, fyrrverandi starfsmannastjóri Hvíta hússins, er einn þeirra og sömuleiðis Sean Spicer, fyrrverandi talsmaður Hvíta hússins.



Starfsmenn Alríkislögreglu Bandaríkjanna (FBI) gerðu húsleit á heimili Paul Manafort, fyrrverandi kosningastjóra Trump, í sumar. Hann hefur verið til rannsóknar vegna fasteignaviðskipta í Rússlandi og starfa hans fyrir stjórnmálaflokk í Úkraínu sem talinn er hliðhollur Rússlandi.



Sömuleiðis hefur Michael Flynn, ráðgjafi í framboði Trump og fyrrverandi þjóðaröryggisráðgjafi Hvíta hússins, verið til rannsóknar. Hann var rekinn úr starfi þjóðaröryggisráðgjafa í febrúar eftir að hann sagði meðal annars Mike Pence, varaforseta, ósatt um samskipti sín og Sergei Kislyak, þáverandi sendiherra Rússlands í Bandaríkjunum.



Repúblikanar hafa gagnrýnt að upplýsingar um ákæruna hafi lekið til fjölmiðla og segja það vera klárt lögbrot.


Tengdar fréttir

Gögn sem framboð Trump fékk fóru í gegnum Kreml

Einhvers konar samráð virðist hafa átt sér stað á milli rússnesks lögmanns sem fundaði með framboði Trump og ríkissaksóknara Rússlands fyrir fundinn umtalaða í fyrra.

Kushner: Framboð Trump var of óskipulagt til að eiga samráð við Rússa

Tengdasonur Donalds Trump Bandaríkjaforseta útskýrði fyrir hópi lærlinga í Bandaríkjaþingi að forsetaframboð tengdaföður síns hafi verið of glundroðakennt til að það hafi getað staðið í samráði við rússnesk stjórnvöld. Blaðafulltrúi Hvíta hússins segir að forsetinn hafi komið að misvísandi yfirlýsingu sem sonur hans gaf út um umdeildan fund með rússneskum lögmanni.

Mueller krefst gagna frá Hvíta húsinu

Umdeildar athafnir Donalds Trump í embætti eru á meðal viðburða sem sérstakur rannsakandi bandaríska dómsmálaráðuneytisins vill fá gögn um frá Hvíta húsinu.

„Ég elska það“: Trump yngri birtir tölvupóstana

Í póstunum segir berum orðum að fundurinn sé til að koma upplýsingum í þeirra hendur sem gætu skaðað framboð Hillary Clinton og að það sé liður í aðgerðum stjórnvalda Rússlands til að styðja framboð Trump.

Trump ræðst enn á eigin dómsmálaráðherra og yfirmann FBI

Reiðilestur Donald Trump Bandaríkjaforseta yfir Jeff Sessions dómsmálaráðherra heldur áfram. Nú vill forsetinn vita hvers vegna Sessions hefur ekki látið starfandi forstjóra FBI fara vegna meints hagsmunaáreksturs við rannsókn á Hillary Clinton.

Facebook afhendir þinginu Rússagögnin

Facebook mun veita báðum deildum bandaríska þingsins aðgang að gögnum er varða kaup rússneskra fyrirtækja á auglýsingum fyrir forsetakosningarnar í Bandaríkjunum í fyrra.




Fleiri fréttir

Sjá meira


×