Barn, trúlofun og tónleikar

Daníel Geir Mortiz lætur gamlan draum rætast og ætlar að halda jólatónleika í tilefni þess að það eru tíu ár síðan hann vann jólalagakeppni. Hann verður nýorðinn faðir þegar tónleikarnir fara fram og setti upp trúlofunarhring á afmælisdaginn.

Jólastress 2017 verður sprenghlægileg blanda af jólatónleikum og gamanmálum en þeir verða 9. desember. Tilurð þessarar jólaskemmtunar er að áratugur er síðan Daníel Geir Moritz og Jólabandið unnu Jólalagakeppni með laginu Gjöfin mín ert þú. Hópurinn lék það svo eftir tveimur árum síðar með laginu Jólastress. Til að gera kvöldið sem veglegast hefur Daníel smalað saman góðum gestum og verða flutt mörg af vinsælustu jólalögum landans.

Daníel stendur á miklum tímamótum en hann og unnusta hans, Sigurleif Kristmannsdóttir, settu nýlega upp hringana og eiga von á sínu fyrsta barni. Hann er kennari og því er nafnið engin tilviljun. Jólastressið 2017. „Hún á von á sér 7.  október, rétt handan við hornið. Þetta verður ansi viðburðaríkt haust, trúlega það viðburðaríkasta í lífi mínu án vafa,“ segir Daníel.

Hann segir að þetta tónleikahald sé gamall draumur sem nú sé að rætast. „Hann er eiginlega tíu ára gamall. Mér fannst það miður að við héldum ekki tónleika á sínum tíma því þessi lög, sem við sömdum, voru að fá ágæta spilun og myndbönd í sýningu en það vantaði alltaf að halda tónleika,“ segir hann.

Hann bendir á að þrátt fyrir afslappað andrúmsloft þar sem meira verður lagt upp úr hlátri og gleði þá verði enginn afsláttur gefinn af tónlistaratriðunum. „Þetta eru metnaðarfullir tónleikar þó meira sé lagt upp úr fjöri en hátíðleika. Ég blanda saman alls konar pælingum, jólagestum Björgvins, uppistandi og vitleysu. Gestir koma líka í sófaspjall í anda Hemma Gunn. Það snjóar ekki úr loftinu og enginn krúttlegur barnakór mætir en hláturtaugarnar verða kitlaðar.“

Þetta verður í fyrsta skipti í þrjú ár, nánast upp á dag þar sem Daníel stendur uppi á sviði og sprellar fyrir fólk en eftir að hann einbeitti sér að kennslunni fóru míkrófónninn og grínið upp í hillu.

Hann segist vera mikið jólabarn. Svo mikið að hann hlusti á jólalög jafnvel allt árið um kring. „Þegar maður er ekki í hljómsveit þá þarf maður að finna tilgang til að semja. Ég samdi fyrir hátíðarnar Franska daga og Neistaflug og það hentar vel fyrir glamrara að semja jólalög. Ég er mikið jólabarn og hef aldrei vaxið upp úr því. Ég hlusta mikið á jólalög allt árið. Þetta er einhver tónlist sem ég hef og hef alltaf haft.“