Hillingar frumsýna myndband: „Getur verið auðvelt að fara yfir strikið“

„Út af leið fjallar um mörkin milli þess að fá sér nokkra bjóra með vinum annars vegar og fíkniefnaneyslu hins vegar. Það getur verið auðvelt að fara yfir strikið þar sem hópþrýstingur getur skert dómgreind fólks,“ segir Árni Beinteinn, tónlistarmaðurinn og leikstjórinn, um lag og myndband sem Hillingar frumsýna á Vísi í dag. Sveitin hefur nú frumsýnt  nýtt myndband síðust þrjá fimmtudaga á Lífinu. Nú er komið að laginu Út af leið.

„Atburðarásir svipaðar þeirri sem birtist í lagatextanum og myndbandinu standa því miður nálægt okkur flestum og það er fjallað um mál eins og þessi í fréttum reglulega. Við skoðum mismunandi karaktera innan sögunnar og berum saman hlutverk þeirra. Okkar útgangspunktur er ungur strákur sem flækist inn í rangan vinahóp og er að átta sig á því að hann er farinn út af leið. Þetta er sorglegur veruleiki hjá ungu fólki sem því miður endar alls ekki alltaf vel. Partístandið getur endað með skelfingu.“

Drengjunum langaði að búa til tónlistarmyndband þar sem skýrt má sjá hvernig almenn skemmtidrykkja getur breyst í aðeins óhóflegra partýstand á stuttum tíma.

„Þetta er viðeigandi á Íslandi í dag þar sem mörg ungmenni verða vitni að slíkri menningu og þurfa að gera upp við sig sjálf hvort þau vilji taka þátt eða ekki. Við fórum langt frá okkur sjálfum í persónusköpuninni og þurftum að gera töluverða rannsóknarvinnu áður en tökur hófust. Við erum allir í karakter eins og í hinum myndböndunum en það á samt ekki bara við um myndbandið heldur einnig lagið því að þar erum við að vinna með það sem við köllum karaktertextagerð. Lagið er einskonar saga líkt og myndbandið og við segjum hug persónanna í textanum,“ segir Jóhannes Gauti taktsmiður lagsins.

Myndbandið var tekið upp í Edinborg á Skotlandi og varð til á þremur tökudögum. Einn aðalframleiðandi myndbandsins, Ísarr Nikulás Gunnarsson, stundar nám í Edinborg og sá því um að bóka tökustaði og aukaleikara fyrir myndbandið. Götur Edinborgar og kastalinn gamli gefa síðan myndbandinu öðruvísi útlit en áður hefur sést í íslenskum rappmyndböndum.

„Myndbandið við Út af leið er lokamyndbandið í svarthvíta þríleiknum okkar en eins og áður hefur komið fram er það stefna okkar að gefa út myndbönd við öll lögin svo það má vel búast við meira efni,“ segir Árni Beinteinn.