HÍ kaupir jeppa fyrir Jarðskjálftamiðstöð

Háskóli Íslands hefur keypt nýjan Kia Sportage jeppa fyrir Jarðskjálftamiðstöð Háskóla Íslands á Selfossi. Kaupverðið nemur rúmum 5,3 milljónum króna samkvæmt upplýsingum frá rektor HÍ, Jóni Atla Benediktssyni.

Háskólinn er með þessu að endurnýja átta ára gamlan Hyundai Tucson-jeppa sem Jarðskjálftamiðstöðin hefur haft til afnota frá árinu 2011. Ríkiskaup reyna nú að selja gamla bílinn á uppboðsvef Króks en hann er ekinn 183 þúsund kílómetra og sagður í góðu lagi utan þess að rúðuþurrkur að aftan virka ekki. Samkvæmt sölulýsingu þarf að gæta þess að taka dísilolíu áður en olíumælir fer of neðarlega þar sem hann sýni alltaf örlítið meira en raunverulega er í tankinum.

Í svari við fyrirspurn Fréttablaðsins um bifreiðakaupin segir Jón Atli Benediktsson, rektor HÍ, að viðgerðarkostnaður við gömlu bifreiðina hafi verið orðinn mikill og því nauðsynlegt að fá nýja.

Jarðskjálftamiðstöð HÍ fær bifreið til að sinna jarðskjálftamælingum og eftirliti með mælingum. Segir rektor að mælar séu meðal annars í öllum virkjunum og stíflum Landsvirkjunar og á Norðurlandi.

„Þar sem eftirlit jarðskjálftamælinga er að stórum hluta í virkjunum á hálendinu þá er nauðsynlegt að kaupa 4x4 bifreið,“ segir Jón Atli í svarinu og bendir á að óskað hafi verið eftir sambærilegri bifreið hjá Ríkiskaupum sem farið hefði í örútboð. Út úr því kom að keyptur var 2017 árgerð af Kia Sportage-jeppa þann 30. ágúst síðastliðinn.

Happdrætti Háskóla Íslands hefur í gegnum tíðina séð rektorum Háskóla Íslands fyrir bifreið en fram kom í svari við fyrirspurn á þingi árið 2015 að svo virtist sem sá samningur byggðist á langri hefð. Aðspurður hvort þetta fyrirkomulag væri enn við lýði segir Jón Atli að hann hafi ekki verið með slíkan bíl síðan hann tók við árið 2015.