Taylor Swift hreinsar allt út af samfélagsmiðlareikningunum sínum

Aðdáendur söngkonunnar Taylor Swift eru margir hverjir í áfalli eftir heljarinnar hreinsanir sem stjarnan hefur gert á samfélagsmiðlareikningum sínum í dag.

Swift hefur lengi verið meðal vinsælustu notenda Instagram og er hún sem stendur með rúmlega 100 milljón fylgjendur. Þeir skilja hvorki upp né niður í því af hverju hún tók upp á því í dag að eyða öllum myndunum sem hún hafði nokkurn tímann birt á miðlinum. Ekki nóg með það heldur er hún hætt að fylgja nokkrum einasta manni á Instagram og hefur fjarlægt prófílmyndina sína í þokkabót.

Svipaða sögu er að segja á Twitter. Swift hefur eytt öllum tístum síðastliðinna 7 ára, 85.4 milljón fylgjendum sínum til mikils ama.

Facebook-reikningur hennar fékk sömu útreið. Hann er jafn mikið „Blank Space“ og aðrir samfélagsmiðlareikningar hennar. Og heimasíðan hennar? Jebb, þú giskaðir rétt. Líka auð.

Ekki er vitað hvers vegna söngkonan tók upp á þessum hreinsunum en margir telja að þetta kunni að vera fyrirboði nýrrar plötu frá Swift. Aðrir netverjar grínast með það að hún sé einungis að fagna afmæli lagsins Shake it off, sem er þriggja ára í dag.

Söngkonan sigraði á dögunum mál gegn útvarpsmanni sem káfaði á berum rassi hennar í myndatöku. Hún hlaut einn Bandaríkjadal í skaðabætur, eins og krafist var.