Braust inn í bíl en eigandi náði þýfinu

Á áttunda tímanum í gærkvöldi var tilkynnt um mann vera að brjótast inn í bifreið við Hávallagötu í Reykjavík. Eigandi bifreiðarinnar kom að manninum og náði af honum tösku með ætluðu þýfi en þjófurinn náði að hlaupa í burtu. Þetta kemur fram í dagbók lögreglunnar á höfuðborgarsvæðinu.

Þjófurinn var handtekinn skömmu síðar og færður á lögreglustöð. Þar fundust á honum ætluð fíkniefni en af honum var þar að auki tekin skýrsla. Manninum var að því búnu sleppt úr haldi lögreglu.

Þá var maður handtekinn í Garðabæ um sjöleytið í gærkvöldi en hann var grunaður um að hafa valdið umferðaróhappi og að hafa ekið bifreið undir áhrifum áfengis og fíkniefna. Hann var fluttur í fangageymslu lögreglu vegna rannsóknar málsins.

Um klukkan ellefu í gærkvöldi var maður handtekinn við Laugardalshöll. Hann var ofurölvi og lét ófriðlega. Hann var vistaður í fangageymslu og þess beðið að ástand hans batni.

Þrír ökumenn til viðbótar voru stöðvaðir vegna gruns um akstur undir áhrifum áfengis eða fíkniefna. Einn þeirra var sviptur ökuréttindum.